Deron Williams skoraði 57 stig og bætti stigamet vetrarins

Deron Williams hjá NJ Nets var maður næturinnar í NBA-deildinni er hann skoraði 57 stig í naumum sigri Nets á Charlotte. Enginn leikmaður hefur skorað eins mikið í einum leik í vetur. Kevin Durant hafði þar til í nótt skorað mest eða 51 stig.

Þetta var þess utan persónulegt stigamet hjá Williams í einum leik. Williams skoraði 22 stig í þriðja leikhluta er Nets kom til baka eftir að hafa verið undir í hálfleik.

Derrick Rose skoraði síðan 35 stig fyrir Chicago í sjötta sigri liðsins í röð á Philadelphia. Þetta var hæsta stigaskor Rose í vetur.

Úrslit:

Boston-NY Knicks  115-111

LA Lakers-Miami  93-83

Toronto-Golden State  83-75

Charlotte-NJ Nets  101-104

Philadelphia-Chicago  91-96

Houston-LA Clippers  103-105

Phoenix-Sacramento  96-88

San Antonio-Denver  94-99