Mun kalla menn til ábyrgðar vegna uppsagnarinnar

Gunnar Andersen vill fá svar fyrir klukkan fjögur á morgun um það hvort stjórn Fjármálaeftirlitsins muni hætta við uppsögn hans. Þetta kemur fram í bréfi sem lögmaður Gunnars, Skúli Bjarnason, sendi stjórn Fjármálaeftirlitsins í dag.

Krafa Gunnars er lögð fram eftir að fjármálaráðuneytið úrskurðaði í dag að Gunnar væri embættismaður og nyti réttinda sem slíkur samkvæmt starfsmannalögum.

Í bréfi Skúla kemur fram að réttindi Gunnars hafi verið virt að vettugi í yfirstandandi brottrekstrarferli sem hófst á föstudag fyrir viku síðan þrátt fyrir ítrekaðar kröfur og ábendingar um réttarstöðu hans.

Í bréfinu kemur fram að Gunnar líti brotin gegn sér mjög alvarlegum augum og muni kalla menn til ábyrgðar á því. Hann vilji svar frá stjórninni fyrir klukkan fjögur á morgun og muni bíða með aðgerðir þangað til.