Schumacher hræðir Rosberg ekki

Liðsfélagi Michael Schumacher hjá Mercedes liðinu, þjóðverjinn Nico Rosberg, segir sjöfalda heimsmeistarann ekki hræða sig. Schumacher hefur nú þriðja ár endurkomu sinnar í Formúlu 1.

Þeir hafa verið liðsfélagar öll ár endurkomu Schumachers en Rosberg hefur alltaf haft yfirhöndina. En nú er gamli allur að koma til, farinn að læra á ný dekk og gjörbreytta bíla. Markmiðið með endurkomunni var alltaf að gera Mercedes að meistaraliði. Þó það hafi ekki gerst ennþá er of snemt að afskrifa þennan sigursælasta ökumann allra tíma.

Rosberg skoraði nánast tvöfalt fleiri stig en Schumi árið 2010 en bilið minnkaði niður í aðeins 13 stig í fyrra. Lærisveinninn er samt sem áður pollrólegur, meðal annars vegna þess að hann slátraði sjöföldum heimsmeistaranum í tímatökum 16-3 í fyrra.

"Hann minnkaði forskotið mitt í heimsmeistarakeppninni frá því 2010 í fyrra," sagði Rosberg í viðtali við Car tímaritið. "Tímatökurnar töpuðu vægi sínu árið 2011, en Michael hefur samt bætt sig mikið."

Rosberg segir að samband þeirra Schumachers sé nú gott og afslappað. "Í fyrra bar ég mjög mikla virðingu fyrir honum, en það hefur allt jafnað sig. Nú höfum við jafna stöðu og allt er mikið afslappaðra."

Þess má geta að árið 1995, þegar Schumacher tilkynnti að hann færi til Ferrari, gaf hann loforð um að hann myndi gera Ferrari aftur að heimsmeisturum á fimm árum. Hann stóð við það og gott betur: Gerði Ferrari að heimsmeistarum bílasmiða sex ár í röð (1999-2004) og sig að heimsmeistara fimm ár í röð (2000-2004).