Wozniacki búin að reka þjálfarann sinn

Danska tennisstjarnan Caroline Wozniacki er búin að finna blóraböggul fyrir slæmu gengi hennar á opna ástralska mótinu þar sem hún datt út úr átta manna úrslitum og missti í kjölfarið efsta sætið á heimslistanum.

Wozniacki og faðir hennar, Piotr Wozniacki, hafa ákveðið að reka þjálfara hennar, Spánverjann Ricardo Sanchez, sem var aðeins búinn að vera með hana í nokkra mánuði.

Caroline Wozniacki missti ekki bara toppsætið á heimslistanum við ófarirnar í Ástralíu því hún datt alla leið niður í fjórða sætið. Hún á enn eftir að vinna risamót á ferlinum og átti ráðningin á Ricardo Sanchez að hjálpa til að brjóta ísinn. Hann fékk hinsvegar ekki mörg tækifæri og var sparkað við fyrsta mótlæti.