Sjóðurinn dugir ekki fyrir bótum til bænda

Þeim 25 til 30 milljónum sem Bjargráðasjóður hefur yfir að ráða verður varið í að bæta bændum tjónið eftir óveður. Ljóst er að aukafjármagns er þörf. Engin leið að vita umfang tjónsins í dag. Ráðherra gefur grænt ljós á aukafjárveitingu.

Öllum fjármunum Bjargráðasjóðs, um 25 til 30 milljónum króna, verður ráðstafað til að bæta bændum á Norðurlandi tjónið sem hlaust eftir fárviðrið 10. og 11. september. Líklegt þykir að frekari fjármunum verði varið til aðgerðanna, en engin leið er að vita umfang tjónsins eins og er. Um er að ræða allar eftirstöðvar A-hluta sjóðsins eftir eldgosin í Eyjafjallajökli og Grímsvötnum.

Árni Snæbjörnsson, framkvæmdastjóri Bjargráðasjóðs, segir ljóst að núverandi innistæða sjóðsins dugi ekki til að bæta bændum það tjón sem þeir hafa orðið fyrir, heldur þurfi að koma til aukafjárframlags frá ríkinu. Um sé að ræða svo margþættar skemmdir að of snemmt sé að segja nokkuð til um fjárhæðir.

„Eftir að tjónið hefur verið metið verður að leita leiða til að afla frekari peninga,“ segir hann. „Svo þarf að ákveða hvort bæturnar verði greiddar að fullu eða hvort það verði að skerða þær eitthvað vegna peningastöðu.“

Tekjur Bjargráðasjóðs koma af búnaðargjaldi frá bændum og tíu milljónum árlega úr ríkissjóði. Árni útskýrir að þó ómögulegt sé að meta umfang tjónsins nú, sé ljóst að um sé að ræða umtalsverðan missi á búfé og tjón á girðingum. „Þetta er alvarlegt ástand,“ segir hann. „Við höfum skyldur í þessum málum og við munum bregðast við.“

Engar tölur liggja fyrir um fjölda fjár sem hefur drepist í hamförunum á Norðurlandi undanfarnar tvær vikur. Þó er ljóst að hundruð ef ekki þúsundir fjár komast aldrei heim á bæ.

Steingrímur J. Sigfússon atvinnuvegaráðherra sagði í ræðu sinni á Alþingi í vikunni að ríkisstjórnin hefði samþykkt að nýta eftirstöðvar Bjargráðasjóðs til að bæta tjónið og að vonast væri til að þær fjárhæðir dygðu. Að sjálfsögðu yrði fjármunum þó bætt við ef þyrfti til.

Steingrímur vildi þó ekki gefa fyrir fram loforð eða yfirlýsingar um nákvæmlega hvernig tekið yrði á afleiddu tjóni bænda, eins og tjóni á girðingum, en gert væri ráð fyrir að bæta það sem hægt yrði. sunna@frettabladid.is