Annþór ávarpaði dóminn: Varla ofbeldi að hrækja á skikkju dómara

„Það sem stendur hérna er rangt!" sagði Annþór Karlsson í Héraðsdómi Reykjaness í kvöld. Aðalmeðferð í máli ákæruvaldsins gegn honum, Berki Birgissyni og átta öðrum er nú lokið. Við upphaf aðalmeðferðar í dag fóru þeir fram á að ávarpa dóminn að lokinni aðalmeðferð.

Annþór hóf ávarp sitt klukkan 17:50, eftir að sækjandi og verjandi höfðu lokið sínu máli.

Rétt eins og lögmaður hans, Guðmundur St. Ragnarsson, hafði ítrekað bent á, vildi Annþór vekja athygli á vissum þáttum sem lúta að rannsókn lögreglu á líkamsárásarmáli sem átti sér stað í Mosfellsbæ þann 4. janúar á þessu ári.

„Rannsóknin er búin að vera léleg og ég er því miður hræddur um að það sé búið að ákveða þennan dóm fyrir löngu, að það sé aðeins formsatriði að halda þessi réttarhöld. Það er ekki tekið tillit til okkar og hefur aldrei verið gert."

Þá fór Annþór hörðum orðum um ríkissaksóknara.

„Ríkissaksóknari segir að allir brotaþolar hafi hlotið beinbrot og af þeim sökum ber að dæma mig í gæsluvarðhald. Sakargiftirnar eru rangar og hafa verið það frá byrjun þessa máls. Það hefur komið fram að bæði lögregla og aðrir glæpamenn eru búnir að biðja menn um að bera ljúgvitni gegn mér. Svo virðist sem að því sé bara sópað undir mottu og virðist ekki skipta máli."

Dómari ítrekaði þá fyrir Annþóri að algjör óþarfi væri að vísa í gögn málsins og atriði sem saksóknari og verjendur hefðu nefnt.

„Mér finnst þetta skipta máli," sagði Annþór þá og dómari svaraði: „Ekki endurflytja málið."

Þá vildi Annþór ítreka að sá viðbúnaður sem lögreglan hefur haft í kringum aðalmeðferðina hafi verið óþarfi.

„Ég og Börkur höfum verið edrú í langan tíma. Bergur Már [brotaþoli] hefur sagt að hann hafi verið útúrdópaður á þessum tíma. Það er merkilegt að framburður þeirra sé tekinn fram yfir okkar."

„Það er búið til show um að við séum hættulegir, fluttir á milli staða. Það var aðeins eitt slíkt tilfelli hjá Berki. Hann hrækti á skikkju dómara, sem ég tel nú varla vera ofbeldi."