Hornfirðingar fá knatthús

Á morgun verður nýtt fjölnota knatthús á Höfn í Hornafirði vígt við hátíðlega athöfn. Húsið er gjöf frá fyrirtækinu Skinney-Þinganesi til sveitarfélagsins og íbúa héraðsins.

Á 60 ára afmæli fyrirtækisins árið 2006 ákváðu eigendur að leggja stórt framlag til íþróttamála og skilyrtu framlagið að byggt yrði knatthúss með gervigrasi.

Ljóst er að gífurlegur aðstöðumunur verður fyrir knattspyrnufólk að stunda æfingar og sömuleiðis fyrir alla sem vilja stunda holla hreyfingu í skjóli frá roki og rigningu. Nýja húsið er rúmlega 4.000 fermetrar og rúmlega 42.000 rúmmetrar.

Mikil stemming hefur skapast á Hornafirði fyrir húsinu og nafnasamkeppni sett af stað þar sem verðlaun eru gefin fyrir þann sem á vinningstillöguna, 190 tillögur bárust til nefndarinnar.

Sérstök athöfn verður á laugardaginn þar sem nafnbirtingin verður gerð kunn, ýmis skemmtiatriði, Big band, Karlakórinn Jökull og Harmonikkubræður.

Vígsla knatthússins fer formlega fram kl.12:00 með ávörpum frá fulltrúum Skinney Þinganes og sveitarfélagsins.

Þá verður hamborgarveisla og íbúar fá að taka þátt í knattleikjum fram eftir degi.