Harma tvöföldun á verði nemakorta í strætó

Ung vinstri græn á höfuðborgarsvæðinu harma þá ákvörðun Strætó að hækka verð á nemakortum. Þeir segja forsendu þess að nemar ferðist á umhverfisvænan máta að kortin séu á lágu verði.

„Nemar eru eðli málsins samkvæmt ekki með sömu ráðstöfunartekjur og fólk á vinnumarkaði og því er nauðsynlegt að sú þjónusta sem þeim stendur til boða taki mið af því," segir í fréttatilkynningu og áhyggjur hafðar af því að þessi stærsti notendahópur Strætó hætti að nota þjónustuna.

Nemakortin gilda núna í heilt ár og verð á þeim er 38.500 kr. miðað við 20.000 krónur í fyrra en þá gilti kortið aðeins í níu mánuði.

„Þriggja mánaða lenging gildistíma, sem nemar hafa takmörkuð not af enda eru skólar almennt ekki starfræktir á sumrin, er alls ekki réttlæting fyrir tvöföldun þess gjalds sem krafist var ári fyrr," segir í fréttatilkynningu Ung vinstri grænna.