Skemmdist í árekstri við innkaupakerru

Tjón varð á leigubifreið í vikunni þegar stjórnlaus innkaupakerra lenti á bílnum. Bifreiðin var kyrrstæð við Flugstöð Leifs Eiríkssonar þegar innkaupakerran hentist út úr Fríhöfninni á mikilli ferð og lenti á bílnum.

Lögreglan á Suðurnesjum rannsakaði þetta mál en að undanförnu hefur hún einnig haft afskipti af fjölda ökumanna sem keyrðu of hratt. Sá sem hraðast ók mældist á 130 km/klst á Reykjanesbraut, en þar er hámarkshraði 90 km/klst.

Lögreglan hafði einnig afskipti af konu sem stöðvuð var með fíkniefni í Leifsstöð við komu sína til landsins. Um neysluskammt af hassi var að ræða sem vafinn var í plast og falinn í nærbuxum konunnar.