Borgin gefur rithöfundum Gunnarshús

Borgarstjórinn Jón Gnarr mun undirrita gjafarafsal á morgun við athöfn í Gunnarshúsi en borgarráð hefur ákveðið að færa Rithöfundasambandi Íslands húsið að gjöf. Gunnarshús var heimili rithöfundarins Gunnars Gunnarssonar.

Signý Pálsdóttir, skrifstofustjóri menningarmála hjá borginni, segir að lengi hafi verið til umræðu að gefa rithöfundasambandinu húsið, eða síðan ákveðið var að Reykjavík yrði bókmenntaborg UNESCO. Það var loks samþykkt í borgarráði 14. júní.

Húsið hefur smám saman orðið nokkurs konar andlit rithöfundasambandsins. Það hefur verið notað sem félagsaðstaða og miðstöð íslenskra höfunda.

Gunnarshús var byggt á árunum 1950 - 52 sem heimili Gunnars Gunnarssonar rithöfundar og Fransisku konu hans. Reykjavíkurborg keypti húsið árið 1991 eftir hvatningu frá Rithöfundasambandi Íslands og Bandalagi íslenskra listamanna. Húsið er sögulegt bæði í bókmenntalegu og listrænu tilliti, var friðað að utan árið 2008 og að innan árið 2012.

Í tilefni gjafarinnar hefur rithöfundasambandið ákveðið að bjóða öllum borgarbúum og öðrum gestum í hóf laugardaginn 6. október.