Allir átjan ára og yngri fengið skólavist

Vel gengur að innrita í framhaldsskóla fyrir haustið. Allir undir átján ára aldri hafa fengið skólavist og menntamálaráðherra er bjartsýn á að allir eldri nemendur fái einnig inni í skóla.

Lögum samkvæmt ber framhaldsskólum að tryggja öllum umsækjendum átján ára og yngri skólavist en eins og fjölmiðlar greindu frá fyrr í sumar var lengi útlit fyrir að það myndi ganga erfiðlega og einbeittu menn sér að því að koma ungmennum á lögbundnum skólaaldri fyrir. Nú segist Katrín Jakobsdóttir menntamálaráðherra hinsvegar vongóð um að allir sem sóttust eftir skólavist fái inni.

„Þetta gengur bara jafnt og þétt. Núna eru allir nemendur undir átján ára aldri komnir inn, þeir sem sóttust eftir því. Þannig að nú er unnið að því að loka listum með eldri nemendum," sagði Katrín að loknum ríkisstjórnarfundi í morgun.

Tæplega sjöhundruð manns, átján ára og eldri hafa sóst eftir að komast í menntaskóla þetta haustið.

„Við stefnum þangað. Þetta hefur gengið mjög hratt eftir að skólaskrifstofur opnuðu eftir sumarfrí, sem var eftir Verslunarmannahelgi þannig að við auðvitað gerum okkar besta til þess að það takist."