Engin börn inni í skólanum

Slökkviliðið hefur náð tökum á eldi sem kom upp í þaki íþróttahússins við Fellaskóla í Breiðholti. Mikill reykur barst frá svæðinu stuttu eftir að eldurinn kom upp um klukkan korter yfir sjö.

Samkvæmt upplýsingum fréttastofu rifu slökkviliðsmenn þakplötur upp til þess að slökkva í síðustu glóðunum. Allt tiltækt slökkvilið var sent á staðinn og hafa tveir dælubílar verið sendir heim. Nokkrir slökkviliðsmenn eru þó að ganga úr skugga um að eldurinn sé slokknaður.

Samkvæmt upplýsingum frá varðstjóra barst ábending um að börn gætu verið inn í skólanum. En við nánari athugun reyndist það ekki vera rétt. Grunur leikur á að um íkveikju sé að ræða þar sem eldurinn kom utan frá. Lögreglan rannsakar málið.