Tveggja tonna rör féll á mann

Hitaveiturör féll á mann í fyrradag með þeim afleiðingum að hann handleggsbrotnaði. Slysið varð í Svartsengi þar sem verið var að hífa rörið á vagn með hjólaskóflu.

Samkvæmt upplýsingum frá lögreglu var reipi bundið í báða enda þess og því lyft með þeim hætti. Tveir menn voru við sitt hvorn enda þess til að stjórna ferðinni. Annað reipið slitnaði og rörið, sem er um tvö tonn að þyngd og sextán metra langt, lenti á öðrum manninum og braut upphandlegg hans.

Hann var fluttur á Heilbrigðisstofnun Suðurnesja og þaðan á Landspítala. Báðir mennirnir voru með öryggishjálm og í öryggisskóm.