Öll magnkaup á áburði skal tilkynna til lögreglu

Lögreglunni verður tryggður aðgangur að upplýsingum um kaup á áburði sem inniheldur ammoníumnítrat, samkvæmt frumvarpi Ögmundar Jónassonar innanríkisráðherra um vopn, sprengiefni og skotelda. Ekki eru ákvæði um framleiðslu sprengiefnis í gildandi vopnalögum.

Frumvarpið leggur þá skyldu á þá sem framleiða, flytja inn eða versla með sprengiefni eða áburð að tilkynna um öll magnkaup til lögreglunnar. Er þá miðað við að magn sprengiefnis eða íblöndunarefna, það er áburðar, fari yfir 500 kíló á sex mánuðum.

Ögmundur segir frumvarpinu ætlað að koma í veg fyrir að fólk komi sér upp sprengjubirgðum.

„Við horfum þarna til voðaverka eins og í Noregi í júlí í fyrra og annars af því tagi. Þetta eru fyrirbyggjandi aðgerðir og hugsað í þeim anda, samkvæmt ráðleggingum lögreglu. Þarna tökum við mið af því sem Norðurlandaþjóðirnar eru að gera. Við setjum markið ekki mjög lágt, en reynum að finna eðlileg mörk hvað þetta snertir.“

Verði frumvarpið að lögum getur lögreglustjóri hvenær sem er krafist þess að fá aðgang að húsnæði þar sem sprengiefni er framleitt eða geymt og þarf hann ekki sérstaka heimild fyrir því.

Í frumvarpinu eru strangari skorður varðandi vopnaeign, til dæmis hvað varðar innflutning á hálfsjálfvirkum byssum. Þá má hver einstaklingur ekki eiga fleiri en 20 skotvopn.

„Með frumvarpinu er stefnt að því að setja heldur strangari skorður við vopnaeign en verið hefur í lögum. Þó er ekki gengið svo langt að íþróttamönnum á þessu sviði, eða skotveiðimönnum, sé settur stóllinn fyrir dyrnar. Það er reynt að þræða hinn gullna meðalveg í þeim efni. Á hinn bóginn er reynt að koma í veg fyrir vopnaeign sem er af annarri rót sprottin.“