Sharapova auðveldlega í aðra umferð

Maria Sharapova, efsta kona heimslistans í tennis, var ekki í miklum erfiðleikum með hina áströlsku Anastasiu Rodionovu í fyrstu umferð einliðaleiks kvenna á Wimbledon-mótinu í dag.

Sharapova vann sigur í tveimur settum 6-2 og 6-3. Rússinn vann sigur á Opna franska meistaramótinu á dögunum og virtist í jafngóðu formi og í París í upphafi leiks. Hún komst 5-0 yfir í fyrsta settinu en fram að því hafði hún aðeins tapað þremur stigum.

Rodionova klóraði í bakkann en átti aldrei möguleika í Sharapovu sem fagnaði sigri á aðalvellinum í Wimbledon.

„Það er alltaf góð tilfinning að koma aftur á aðalvöllinn. Þessi staður á sérstakan stað í hjarta mínu," sagði Sharapova sem hafnaði í öðru sæti á mótinu í fyrra.