Þorsteinn fer aftur á Litla-Hraun eftir að kókaín fannst í þvagi

Þorsteinn Kragh, sem var dæmdur í níu ára fangelsi fyrir innflutning á um 200 kílóum af hassi og einu og hálfu kílói af kókaíni árið 2009, er aftur á leiðinni á Litla-Hraun eftir að hafa dvalið á Kvíabryggju síðustu misseri. Ástæðan er sú að kókaín fannst í þvagi hans eftir að hann skilaði sér of seint úr dagsleyfi.

Það er DV sem greinir frá málinu í dag. Í blaðinu segir að Þorsteinn hafi farið í dagsleyfi á Porsche-jeppa sínum og þegar hann skilaði sér of seint, eftir miðnætti, vöknuðu grunsemdir á meðal fangavarða að hann hefði notað fíkniefni í leyfinu. Í kjölfarið var hann settur í þvagprufu þar sem kókaín fannst.

Í DV segir ennfremur að Þorsteinn hafi átt viku eftir af afplánun sinni á Kvíabryggju þegar hann var tekin vegna kókaínsneyslunnar - eftir það hefði hann farið á Vernd í Reykjavík. Þess í stað bætast um sex mánuðir við refsingu hans - sem hann þarf að taka út á Litla-Hrauni, að því er segir í blaðinu.