Uppboð til styrktar verðlaunaljósmyndara sem berst við bráðahvítblæði

Vinir ljósmyndarans Ingólfs Júlíussonar ætla að halda veglegt ljósmyndauppboð á Hótel Borg á sunnudaginn honum til stuðnings. Ingólfur greindist með bráðahvítblæði í byrjun október á þessu ári og hefur dvalið á sjúkrahúsi síðan. Í kringum áramót fer Ingólfur til Svíþjóðar þar sem hann mun gangast undir mergsskipti.

Á uppboðinu verður meðal annars að finna málverk eftir Tolla, sem hann gaf sjálfur til söfnunarinnar og myndavél sem tólf helstu ljósmyndarar landsins hafa tekið myndið á og áritað - og filman mun fylgja með, óframkölluð.

„Samhugur félaga hans í stétt ljósmyndara varð til þess að þeir tóku höndum saman og ákváðu að aðstoða þennan hjartahreina og hlýja mann sem Ingólfur er. Það gera þeir til dæmis með þessu veglegasta ljósmyndauppboði Íslandssögunnar og styðja þannig fjárhagslega við bakið á honum og fjölskyldu hans á þessum erfiðu tímum," segir á Facebook-síðu uppboðsins.

Myndir ljósmyndara á borð við RAX, Ara Magg og Ragnar Th. Sigurðsson verða boðnar upp.

Nálgast má Facebook-síðu uppboðsins hér.