Kertalukt kom Landhelgisgæslunni í viðbragðsstöðu

Landhelgisgæslan fékk í gærkvöldi boð um gulleit ljós á himni yfir Seltjarnarnesi. Ljósin líktust mjög neyðarboðum sjómanna og því voru björgunarsveitir settar í viðbragðsstöðu. Brátt kom hins vegar á daginn að engin hætta var á ferðum, ljósin stöfuðu af svífandi kertaluktum sem eru gjarna settar á loft í partíum.

„Við verðum auðvitað að kanna allt svona til hlítar. En þetta er svona tveggja til fjögurra klukkutíma vinna að finna út hvort um neyðarljós sé að ræða eða ekki," segir varðstjóri Landhelgisgæslunnar.

Ljósin sáust víða að og vöktu athygli almennings sem hafði samband við lögreglu. Haft var samband við alla nærstadda báta og á meðan voru björgunarsveitir í startholunum. Eftir nokkurn tíma var þó ljóst að engin hafði lent í háska á svæðinu.

„Þetta eru svona svifluktir sem eru mjög vinsælar í partíum," segir varðstjóri Landhelgisgæslunnar. „Þetta eru eins og litlar bréfljósakrónur. Fólk kveikir á kerti undir þeim og þá fara þær á loft og svífa um himininn."

Landhelgisgæslunni hefur ítrekað borist tilkynningar um svifljós af þessum toga, enda virðast þau vinsælt partí-trix. „Þá upphefst svolítið mikil vinna við að kanna hvort um neyðarsendingar sé að ræða eða ekki. Við höfum lent í því að senda björgunarsveitir af stað með tilheyrandi kostnaði. Fólk ætti jafnvel að láta lögreglu vita áður en það setur svona lukt á loft.