Kaþólska rannsóknarskýrslan ekki birt almenningi

Í fréttatilkynningu frá Pétri Bürcher, biskupi kaþólsku kirkjunnar hér á landi, kemur fram að rannsóknarskýrsla, um kynferðisbrot starfsmanna kirkjunnar, verði ekki birt almenningi, heldur aðeins helstu niðurstöður og tillögur til úrbóta.

Í tilkynningunni segir orðrétt: "Hún [rannsóknarnefndin] skuli skila biskupi skýrslu um störf sín en helstu niðurstöður og tillögur rannsóknarnefndarinnar verði britar opinberlega."

Af þessu orðalagi að dæma verður skýrslan aðeins í höndum biskups en almenningur mun einungis fá aðgang að helstu niðurstöðum skýrslunnar.

Fréttastofa reyndi án árangurs að fá upplýsingar um þetta frá skrifstofu kaþólsku kirkjunnar. Aðstoðarkona Péturs Bürchers sagðist hafa fengið skýr fyrirmæli um að enginn innan kirkjunnar mætti tjá sig og hún ætti að vísa á Róbert R. Spanó, sem fara mun fyrir rannsóknarnefndinni.

Þegar blaðamaður bað um netfang biskupsins sagði hún fyrstu þrjá stafina í netfanginu áður en yfirmaður hennar bannaði henni að halda áfram, og sagðist hún þá ekki hafa leyfi til að gefa upp netfang hans. Biskup væri ekki til viðtals.

Bannið við að gefa upp netfangið verður þó enn undarlegra í ljósi þess að fréttatilkynningin sem barst fjölmiðlum um hádegisbil er send frá einkanetfangi biskups.

Í tilkynningunni biður biskupinn alla þá sem kunna að hafa orðið fyrir kynferðislegum brotum af hálfu presta eða starfsmanna kirkjunnar afsökunar.

---

From: Peter Buercher >

Date: 28. júní 2011 08:25:49 GMT+00:00

To: catholica@catholica.is

Subject: Fréttatilkynning Kaþólsku kirkjunni 28. 06. 2011

Fréttatilkynning Kaþólsku kirkjunnar

28. 06. 2011

Biskup Kaþólsku kirkjunnar, Herra Peter Bürcher, hefur tekið þá ákvörðun að setja á fót óháða rannsóknarnefnd til að rannsaka þær ásakanir sem komið hafa fram um kynferðislegt ofbeldi og áreitni af hálfu vígðra þjóna kirkjunnar og starfsmanna stofnana kirkjunnar, þ. á m. starfsmanna Landakotsskóla fram til ársins 2005. Sérstaklega verði kappkostað að upplýsa um viðbrögð og starfshætti Kaþólsku kirkjunnar í tilefni af slíkum ásökunum. Þá setji nefndin fram tillögur að úrbótum sé þess þörf í ljósi niðurstaðna.

Til ráðgjafar í þessu erfiða máli hefur biskup kallað á  Róbert R. Spanó lagaprófessor, en eins og kunnugt er, var hann í forsæti rannsóknarnefndar um sambærileg mál innan þjóðkirkjunnar. Hefur þess verið farið á leit við Róbert að hann velji fulltrúa í rannsóknarnefndina og setji henni starfsreglur og markmið. Stefnt verði að því að ljúka undirbúningi að stofnun rannsóknarnefnd- arinnar sem fyrst þannig að hún geti hafið störf eigi síðar en 1. september nk. Hún skuli skila biskupi skýrslu um störf sín en helstu niðurstöður og tillögur rannsóknarnefndarinnar verði birtar opinberlega.

Innanríkisráðherra verður tilkynnt um skipan nefndarinnar og honum kynntar starfsreglur hennar strax og þær liggja fyrir.

Að lokum vil ég, sem biskup Kaþólsku kirkjunnar, feta í fótspor Benedikts páfa og biðja alla þá afsökunar og fyrirgefningar sem kunna að hafa orðið fyrir kynferðislegum brotum af hálfu presta eða starfsmanna kirkjunnar.

 

Virðingarfyllst,

Hr. Pétur Bürcher

Biskup Kaþólsku kirkjunnar