Doherty á leið í steininn

Breski ólátabelgurinn Pete Doherty á yfir höfði sér fangelsisvist eftir réttarhöld yfir honum í gær. Doherty viðurkenndi fyrir dómara að hafa verið með kókaín í sínum fórum á sama tíma og kvikmyndagerðarkonan Robin Whitehead lést en grunur leikur á að hún hafi dáið úr ofneyslu. Pete hefur verið grunaður síðan í janúar á síðasta ári um að hafa verið viðriðinn andlátið en hefur alltaf neitað sök. Hann breytti hins vegar framburði sínum í gær og saksóknari í málinu spurði lögfræðing rokkarans hvort skjólstæðingur hans vissi að með þessu gæti hann lent í fangelsi.

 

Doherty hefur margoft komist í kast við lögin vegna eiturlyfjaneyslu sinnar en hann er hvað þekktastur fyrir að vera söngvari The Libertines og Babyshambles auk þess að hafa verið unnusti Kate Moss.