Erla Bolladóttir vill óháða rannsóknarnefnd

Erla Bolladóttir, einn sakborninga í Guðmundar og Geirfinnsmálinu, vill að óháð rannsóknarnefnd rannsaki málið. Fyrr verði réttlætinu ekki fullnægt.

Hæstiréttur hefur ekki viljað taka mál Sævars Ciesielski til endurskoðunar. Guðmundar- og Geirfinnsmálið er því enn óuppgert og að margra mati svartur blettur á sögu réttarkerfis landsins.

Erla Bolladóttir var ein af fimmmeningunum sem dæmd voru fyrir aðild að láti Guðmundar Einarsson og Geirfinns Einarssonar árið 1974. Eftir lát Sævars Cieselski segist hún skynja ríkan vilja í samfélaginu til að málið verði rannsakað á ný.

„Það er mjög mikil undiralda og ekki annað að sjá en langflestir eru að fara fram á það að þetta mál verði tekið upp aftur," segir Erla.

Erla segist í ljósi sögunnar ekki hafa trú á íslenska réttarkerfinu. Hún vill að óháð rannsóknarnefnd skoði málið í heild sinni. Stofnaðar hafi verið rannsóknarnefndar til að rannsaka efnhagshrunið, bankana og málefni kirkjunnar. Nægt tilefni sé því til að skoða Guðmundar- og Geirfinnsmálið.

Erla segir athafnir í upphaflegu rannsókninni geta gert alla rannsóknina ómarktæka, ólöglega og hugsanlega glæpsamlega.

Fá dómsmál hafa verið jafn umdeild í íslenskri réttarfarssögu og Guðmundar- og Geirfinnsmálið. síðustu ár hefur komið í ljós að pyntingar voru notaðir til að ná fram játningum, sakborningum haldið í einangrun svo mánuðum skipti og þeir sviptir svefni. Málið byggðist á játningum sem náð var fram með ólögmætum hætti og síðar dregnar til baka.

Sævar Cieselski, sem hlaut á sínum tíma lífstíðardóm fyrir hlut sinn í málinu, barðist alla tíð fyrir sakleysi sínu en án árangurs.

Hvernig er best að heiðra minningu Sævars? „Eina leiðin til þess að heiðra minningu hans er að taka málið upp aftur og viðurkenna það að maðurinn var ranglega dæmdur og ekki síst að heiðra minningu hans sem föður gagnvart börnum og afkomendum. Að það fari á spjöld sögunnar hver örlög hans voru í raun og veru."