Segir ríkisstjórnina þrýsta Alcoa út af borðinu

Formaður bæjarráðs Norðurþings kennir núverandi ríkisstjórn um að Alcoa íhugi nú að hætta við álver á Bakka og segir hana engan áhuga hafa á verkefninu. Ríkisstjórnin noti friðun Gjástykkis meðal annars til að koma álveri út af borðinu.

Alcoa lýsti því yfir í gær að það myndi í ljósi yfirlýsinga iðnaðarráðherra og annarra frétta af orkusölumálum á Norðurlandi endurskoða áform sín á Bakka. Jón Helgi Björnsson, formaður bæjarráðs Norðurþings, segir þetta mjög miður en komi ekki á óvart. Frá því núverandi ríkisstjórn tók við hafi menn orðið varir við að þar væri enginn áhugi á þessu verkefni. Um breytta stefnu sé að ræða sem menn séu að framfylgja.

Spurður, í ljósi þess að orkan sé takmörkuð, hvort raunhæft sé að reisa álver, og hvort ekki væri þá eðlilegra að leita annarra kosta, svarar Jón Helgi að þeir séu ekki á móti því að leita annarra kosta. Með því að taka út Gjástykki sem kost í orkuöflun sé hins vegar verið að minnka tiltæka orku og þeir líti á friðun Gjástykkis sem leið til að koma álverinu út af borðinu.

Jón Helgi segir að nú verði menn að einbeita sér að minni iðnaðarkostum. Þeir séu hins vegar engan veginn í hendi og þrjú slík verkefni þurfi að lágmarki til að það hafi svipuð áhrif og álver og það sé bæði flókið og erfitt í framkvæmd.