Rifja upp náin tengsl Usmanov og Landsbankans

Danskir fjölmiðlar hafa rifjað upp náin tengsl milli úzbeska auðjöfursins Alisher Usmanov og Landsbankans og Björgólfs Guðmundssonar fyrrum stjórnarformanns bankans. Þetta er gert í framhaldi af fréttum um handtöku Sigurjóns Þ. Árnasonsonar fyrrum bankastjóra Landsbankans.

Í umfjöllun Berlingske Tidende um handtöku Landsbankastjóra eru rifjaðar upp fréttir af samskiptum Usmanov og Kaupþings. Þessi samskipti voru áberandi í íslenskum fjölmiðlum nýlega eftir að í ljós kom að lánanefnd Kaupþings hafði samþykkt 240 milljarða kr. lán til Usmanov korteri fyrir hrun bankans haustið 2008.

Berlingske Tidende furðar sig á því að Kaupþing hafi íhugað að lána Usmanov þar sem Úzbekinn átti í mun nánara samstarfi við Landsbankann og þá sérstaklega Björgólf Guðmundsson fyrrum stjórnarformanns bankans.

Blaðið rifjar upp að það var Björgólfur Guðmundsson sem kynnti Usmanov fyrir þeim eigenda í enska úvalsdeildarliðinu Arsenal sem seldi Úzbekanum upphaflega stóran hlut í liðinu. Á þeim tíma var Björgólfur eigandi og stjórnarformaður í West Ham.

Þegar Usmanov ákvað að auka hlut sinn í Arsenal upp í 21% árið 2007 fyrir um 30 milljónir punda eða 56 milljarða kr. var það Heritable bank, dótturbanki Landsbankans í Bretlandi sem sá um þau kaup fyrir Usmanov.

Fjallað var um þessi viðskipti á sínum tíma í grein í breska blaðinu Guardian. Þar segir að þessi samskipti vekji þá spurningu hvort Björgólfur Guðmundsson hafi einnig komið á tengslum milli Usmanov og David Dein þegar Usmanov keypti upphaflega 14% í Arsenal af Dein.