Umfjöllun: Latir FH-ingar heppnir að fá stig gegn Víkingi

Ef FH ætlar að spila í sumar eins og liðið gerði í kvöld gegn Víkingi þá á liðið enga möguleika á titlinum. Meistaraefnin í Firðinum mættu hrokafull til leiks gegn Víkingi og héldu að hægt væri að fá þrjú stig gegn þeim án fyrirhafnar. Það gekk svo sannarlega ekki eftir því baráttuglaðir Víkingar voru hreinlega heppnir að taka ekki öll stigin í Krikanum í kvöld.

Gestirnir úr Víkinni mættu geysilega grimmir til leiks og báru enga virðingu fyrir meistaraefnunum úr Firðinum. Víkingarnir voru augljóslega tilbúnir að deyja fyrir þrjú stig en FH-ingar virtust halda að þetta yrði þægileg ganga í garðinum.

Þeir voru ekki tilbúnir að mæta baráttuglöðum Víkingum sem pressuðu út um allan völl. FH fékk ekki sekúndu með boltann og þessi magnaða mótspyrna gestanna virtist koma þeim í opna skjöldu. Hún hefði ekki átt að gera það.

Það var afar sanngjarnt þegar Egill kom Víkingi yfir með laglegu skallamarki eftir sendingu frá Sigurði Agli. Víkingur hefði átt að ná tveggja marka forskoti undir lok hálfleiksins þegar Kemar Roofe fékk frían skalla á markteig.

Skallinn var slakur og Gunnleifur gerði vel í að verja. Roofe var síðan fáranlega seinn á fætur til þess að taka frákastið og FH slapp með skrekkinn. 0-2 hefði ekki verið ósanngjarnt í hálfleik.

Það var enginn taktur í leik FH í fyrri hálfleik. Vörnin slök, miðjan úti á túni og þar af leiðandi fengu sóknarmennirnir ekki úr neinu að moða. Allar aðgerðir FH-inga voru hægar og fyrirsjáanlegar. Mestu munaði þó um að þeir voru ekki til í að slást eins og Víkingar um boltann.

Víkingar lögðust nokkuð til baka í síðari hálfleik og leyfðu FH að sækja. Þó svo FH hefði haft yfirburði út á vellinum gekk liðinu nákvæmlega ekki neitt að skapa sér færi.

Það var aðeins fyrir snilldartilþrif Hannesar sem FH náði að jafna. Hann negldi þá boltanum í fjærhornið úr teignum. Afar smekklega gert. Annars var sóknarleikur FH tilviljanakenndur og hægur. Það var nákvæmlega ekkert að gerast hjá þeim.

Þegar upp er staðið geta Víkingar nagað sig í handarbökin yfir því að hafa ekki tekið öll stigin í þessum leik.

Þeir mættu hrokafullu FH-liði sem hélt að það gæti unnið sigur á nýliðunum án þess að hafa fyrir því. Slíkt hugarfar kann aldrei góðri lukku að stýra og það er verk að vinna hjá þjálfarateymi FH að trekkja leikmenn í gang á nýjan leik og fá þá til þess að vinna fyrir hlutunum.

Víkingar voru flottir. Pressuðu FH grimmt og börðust eins og ljón. Halldór Smári frábær á miðjunni sem og Rutgers í vörninni. Frammi var hinn 37 ára gamli Helgi Sigurðsson ódrepandi og hljóp líklega meira en fjórir FH-ingar samanlagt.

Ef FH-ingar hefðu nennt að skila jafn góðu vinnuframlagi og þessi aldni höfðingi hefðu úrslit þessa leiks hugsanlega orðið önnur. FH-ingar nenntu því hins vegar ekki og þess vegna eru þeir í vandræðum þessa dagana.

FH-Víkingur  1-1

0-1 Egill Atlason (28.)

1-1 Hannes Þ. Sigurðsson (74.)

Áhorfendur: Ekki gefið upp.

Dómari: Gunnar Jarl Jónsson  7.

Skot (á mark): 13-10 (3-5)

Varin skot: Gunnleifur 4 – Magnús 2

Horn: 8-5

Aukaspyrnur fengnar: 17-12

Rangstöður: 3-0

FH (4-3-3)

Gunnleifur Gunnleifsson  6

Björn Daníel Sverrisson  4

Freyr Bjarnason  3

(46., Tommy Nielsen  6)

Pétur Viðarsson  5

Ásgeir Gunnar Ásgeirsson  4

Hólmar Örn Rúnarsson  4

Hákon Atli Hallfreðsson  3

Matthías Vilhjálmsson  4

Atli Viðar Björnsson  3

Ólafur Páll Snorrason  3

(46., Gunnar Kristjánsson  6)

Hannes Þorsteinn Sigurðsson  6

Víkingur (4-5-1)

Magnús Þormar  6

Hörður Bjarnason  6

Egill Atlason  7

(55., Milos Milojevic  6)

Mark Rutgers  7

Walter Hjaltested  6

Halldór Smári Sigurðsson  7 – Maður leiksins

Denis Abdulahi  5

Sigurður Egill Lárusson  5

Baldur Ingimar  Aðalsteinsson  6

(68., Kjartan Dige Baldursson  4)

Kemar Roofe  4

(57., Marteinn Briem  5)

Helgi Sigurðsson  7