Trúðaskólar sameinaðir og skólastjórnendur taka við borginni

Sigurborg Sveinbjörnsdóttir skrifar 29. mars 2011 06:00

Í „góðærinu" fóru ýmsar stofnanir/fyrirtæki borgarinnar vel fram úr sér hvað laun og fjárfestingar varðar. Á sama tíma voru leikskólar borgarinnar reknir fyrir lítið fé, og starfsfólk þeirra hélt starfinu gangandi á lúsarlaunum á meðan laun viðskipta- og lögfræðimenntaðra meðreiðarsveina útrásarvíkinganna hækkuðu í Range Rover á mánuði – þrátt fyrir að þeir hefðu fáir setið lengur á skólabekk en fagmenntaður leik- eða grunnskólakennari. Góðærið heimsótti aldrei leikskólana, frekar en önnur skólastig, og ekki skilaði ráðgjöf meðreiðarsveinanna þeirri ávöxtun sem menn vonuðust til.

Nú hafa foreldrar og fjölmargir sérfræðingar ályktað gegn tillögum starfshóps um sameiningu leik- og grunnskóla. Fyrir utan starfshópinn sjálfan telja fáir, ef einhverjir, þessi þunnu sameiningarrök vera vel ígrunduð. Ennþá er ósvarað spurningum er snúa að því hvers vegna sameining leggst með svo miklum þunga á sum hverfi umfram önnur. Þá þarf að útskýra hver séu megin rök þess að sumar af upprunalegum tillögum hugnuðust starfshópnum ekki og voru slegnar út af borðinu. Getur það verið að félagslegur styrkur foreldra í nærsamfélagi geti haft þar áhrif? Á hverfafundi nýverið var fulltrúi starfshópsins til svara þegar rætt var um hvernig standa ætti undir kostnaði við fjölgun barna í Vesturbænum; en þar átti að reisa skúra sem nú er búið að fjarlægja. Spurt var, hvers vegna? Svarið var að „foreldrar í Vesturbænum eru svo kröfuharðir og þeir mótmæltu". Það verður að hrósa foreldrum í Vesturbænum fyrir að mótmæla illa ígrunduðum ákvörðunum, en hvað vinnubrögð meirihlutans varðar þarf auðvitað að spyrja; hverslags pólitík er þetta eiginlega?

Ef við skoðum Breiðholtið betur má sjá að sameiningartillögur ná til 86% leikskóla en til 20% í Vesturbænum. Rúm 34% leikskóla sem á að sameina er í Breiðholtinu og þar á að ná fram tæpum 35% hagræðingarinnar í rekstri leikskólanna. Ef starfshópurinn hefði kynnt sér nærsamfélag leikskólanna betur hefðu þeir komist að því að hvergi er eins hátt hlutfall tilvísana til félagsþjónustu er varða börn á leikskólaaldri og þar. Í hverfinu er mjög hátt hlutfall einstæðra foreldra og nýbúa, en sá hópur hefur ekki mjög sterka rödd á hinum pólitíska vettvangi, þar sem þessar ákvarðanir eru teknar. En á hverfafundum síðustu daga hefur meirihlutinn fengið að heyra álit nærsamfélagsins á þessum tillögum. Undirskriftasöfnun gegn tillögunum fjölgar einnig mjög hratt á netinu.

Starfshópurinn hefði einnig auðveldlega geta komist að því með vönduðum vinnubrögðum að mjög erfitt hefur verið að uppfylla reglugerð leikskóla um að 2/3 hlutar starfsfólks sé fagfólk. Og það er þannig með suma af þeim leikskólum sem lagt er til að séu sameinaðir, að litlu fleiri en leikskólastjóri og aðstoðarleikskólastjóri eru fagmenntaðir. Hvert verður þá hlutfall fagfólks eftir þær sameiningar sem fyrir liggja? Foreldrar og börn eiga að geta gengið að því vísu að sú þjónusta sem þau sækja uppfylli reglugerð leikskóla – það er í raun þjónustusamningur borgarinnar við borgarana. Ætlar meirihlutinn að gefa einhvern „afslátt" af því lögbundna verkefni en innheimta samt fullt gjald fyrir þjónustuna?

Með vandaðri vinnu hefði hópurinn einnig komist að því að vegalengd á milli leikskólanna Hraunborgar og Aspar, sem eru í sitthvoru skólahverfi og á að sameina, er ekki 300 metrar eins og fram kemur í skýrslunni, heldur 460 metrar í beinni línu og 600 metrar eftir göngustíg. Það tekur 15 mínútur að ganga hvora leið. Ef við gefum okkur að leikskólastjóri þurfi að fara tvær ferðir á dag milli leikskóla gerir það klukkustund á dag í göngu, fyrir utan þann tíma sem fer í að loka og byrja verkefni á hvorum stað fyrir sig. Þetta gæti því talið 10 klukkustundir á viku; tíma sem auðvitað væri betur varið með börnunum. Þá er ótalinn kostnaður við keyrslu á milli skóla með mat þegar eldhús eru sameinuð.

Ég mótmæli þeirri aðför sem gerð er að leik- og grunnskólum í Breiðholtinu. Þar eru 14 leikskólar og tveir af þeim voru sameinaðir síðastliðið sumar og nú á að sameina tíu til viðbótar. Tillögur að sameiningu grunnskólanna Hólabrekku- og Fellaskóla eru einnig gegn hverfaskipan og skólamenningu hverfanna. Undir það taka örugglega allir íbúar þeirra hverfa er sækja þjónustu í þessa skóla.

Leikskólastjórnendum hefur tekist að veita borgarbúum framúrskarandi þjónustu síðustu áratugi við þröngan fjárhag. Stjórnendur og starfsfólk hafa náð miklum árangri í starfi og hlotið fyrir mikið lof og þakklæti, bæði frá börnum og foreldrum sem notið hafa þjónustunnar. En slíkt hið sama gildir ekki um marga stjórnendur innan borgarkerfisins og ráðgjafa þeirra síðustu misserin.

Ef meirihlutanum er alvara í að ganga metnaðarfullt fram í hagræðingu, og hafa alla uppbyggingu og stjórnun til framtíðar ábyrga, þá hlýtur næsta skref að vera að sameina meirihlutann við Trúðaskólann og fá svo reynda og menntaða leik- og grunnskólastjórnendur til þess að taka við stjórn borgarinnar.