Loðnukvóti HB Granda tvöfaldast milli ára

Samkvæmt upplýsingum Vilhjálms Vilhjálmssonar, deildarstjóra uppsjávarsviðs HB Granda, má reikna með því að af 125 þúsund tonna auknum loðnukvóta komi um 100 þúsund tonn í hlut Íslendinga. Heildarkvóti skipa HB Granda gæti því orðið um 44 þúsund tonn. Til samanburðar má nefna að loðnukvóti þeirra á síðustu vertíð var um 20.500 tonn.

Þetta kemur fram á vefsíðu HB Granda en sem kunnugt hefur verið ákveðið að auka loðnukvótann á yfirstandandi vertíð úr 200.000 tonnum og í 325.000 tonn.

Á vefsíðunni kemur fram að nú er verið að landa um 1.100 tonnum af loðnu úr Ingunni AK á Vopnafirði og þar með er afli skipa HB Granda kominn í um 11 þúsund tonn á vertíðinni. Samkvæmt því gætu eftirstöðvar loðnukvótans verið um 33 þúsund tonn.

Tvö skipa HB Granda, Ingunn og Lundey NS, eru nú á loðnuveiðum en Faxi RE, sem kom með um 670 tonna loðnuafla til Vopnafjarðar um helgina, er farinn til gulldepluveiða í stað Ingunnar sem kom með um 500 tonn af gulldeplu til Akraness sl. fimmtudag.