Jakob æfir í allt að 8 tíma á dag og borðar 10.000 hitaeiningar

Jakob Jóhann Sveinsson var til umfjöllunar í Ísland í dag á Stöð 2 í gærkvöld. Þar kom m.a. fram að sundmaðurinn borðar allt að 10.000 hitaeiningar á dag sem er þrefalt meira en flestir karlmenn þurfa. Hann æfir allt að 8 tíma á dag en Jakob fær 80.000 kr. á mánuði úr afrekssjóði ÍSÍ.

Jakob stefnir að því að komast á Ólympíuleikana í London á næsta ári en það yrðu fjórðu leikar hans á ferlinum. Besti árangur Jakobs á ÓL er 25. sæti.

Sundmaðurinn segir að þeir sem ætli sér að ná langt í sundíþróttinni þurfi annaðhvort að vera af ríku fólki eða eiga fjölskyldu sem er tilbúið að vinna mikið til þess að láta dæmið ganga upp.

Á venjulegum degi mætir Jakob á æfingu um kl. 6 að morgni þar sem hann syndir í 2 tíma hið minnsta. Hann fer síðan á þrekæfingu strax í kjölfarið, og á kvöldin tekur við ný sundæfing. Daglega syndir Íslandsmeistarinn allt að 10 km. en það jafngildir að hlaupa eitt maraþonhlaup fyrir hlaupara. Árlega tekur hann rúmlega 1,6 milljón sundtaka.