Ósátt við skort á samráði

Þingflokksformenn Framsóknarflokksins og Hreyfingarinnar segjast harma þá ákvörðun forseta Alþingis að hafa, án samráðs við þingflokk framsóknarmanna og þinghóp Hreyfingarinnar, ákveðið að breyta venjubundinni dagskrá þingfundar.

Einhliða ákvörðun hafi verið tekin um að setja atkvæðagreiðslu um Icesave á dagskrá klukkan hálftvö ofan í fundartíma þingflokka og á undan hefðbundinni dagskrá án alls samráðs. Aðrir flokkar hafi fengið upplýsingar um þetta og breytt þar með sínum fundartímum.

Þingflokksformennirnir, þau Gunnar Bragi Sveinsson og Margrét Tryggvadóttir, segja að ástæða þessarar breytingar sé þingflokksformönnum kunn. „Hún lýtur að því að einn þingmaður Vinstrihreyfingarinnar græns framboðs er á leið erlendis á vegum alþingis og því er dagskrá breytt. Þó tilefni ferðarinnar geti verið mikilvægt þá eru vinnubrögðin óásættanleg," segja þau Gunnar Bragi og Margrét.

Þau segjast hljóta að velta því fyrir sér hvort forseti Alþingis sé á hlaupum frá lýðræðinu með þessari flýtimeðferð enda rúmlega 30 þúsund Íslendingar búnir að skrifa undir að Icesave III samkomulagið fari í þjóðaratkvæðagreiðslu og ljóst að þúsundir eigi eftir að bætast þar við.