Þýskur þingmaður vill alþjóðlega rannsókn á flugumanninum

Þýski þingmaðurinn Andrej Hunko, þingmaður Der Linke í Þýskalandi, sendi í gær frá sér yfirlýsingu þar sem hann fagnar málsókn átta kvenna sem hafa kært flugumanninn Mark Kennedy fyrir að hafa tælt sig í ástarsambönd á fölskum forsendum í Bretlandi.

Mark Kennedy fór víða, meðal annars dvaldi hann með mótmælendum á Kárahnjúkum.

Þýski þingmaðurinn segir störf flugumannanna brjóta í bága við 8. grein Mannréttindasáttmála Evrópu um rétt til einka- og fjölskyldulífs.

Á heimasíðu náttúruverndarsamtakanna Saving Iceland, þar sem finna má yfirlýsingu Andrej, kemur fram að þingmaðurinn vilji setja á fót óháða og alþjóðlega rannsókn á máli Mark Kennedy og annara lögreglunjósnara sem plantað hefur verið í andófshópa um víða veröld

Þar segir ennfremur að að Þýsk og írsk yfirvöld hafi fyrir löngu viðurkennt að hafa haft vitneskju um störf Kennedy og átt í samstarfi við hann á meðan hann starfði sem flugumaður.

Kennedy sagði sjálfur eftirfarandi í viðtali við breska blaðið Daily Mail: „Ég fór aldrei til útlanda nema með leyfi frá yfirmönnum mínum og lögreglunni á staðnum.“

Ögmundur Jónasson, innanríkisráðherra, heimtaði svör frá ríkislögreglustjóra um störf Kennedys hér á landi. Fátt var um efnisleg svör hjá Ríkislögreglustjóra og var því til stuðnings helst vitnað til þagnarskyldu íslensku lögreglunnar gagnvart þeirri bresku.

Hér er hægt að nálgast heimasíðu Saving Iceland.