Stórir samningar skila góðum tekjum

Ráðgjafafyrirtækið Markó Partners hefur verið milligönguaðili í nokkrum stórum viðskiptasamningum á þessu ári, nú síðast þegar kanadíska sjávarútvegsfyrirtækið High Liner Foods keypti starfsemi Icelandic Group í Bandaríkjunum og Asíu af Framtakssjóði Íslands (FSÍ) á 26,9 milljarða króna í síðasta mánuði. Þá veitti félagið bandaríska fjárfestingasjóðnum Paine og Partners ráðgjöf þegar hann keypti norska fiskimjöls- og lýsisfyrirtækið Scanbio í júlí og vann fyrir kanadíska félagið Cooke Aquaculture við kaup á spænska fiskeldisfélaginu Culmarex, einnig í júlí.

Góð ráð eru dýr

Kjartan Ólafsson, framkvæmdastjóri og eigandi Markó, vill ekki segja hversu háar þóknanir ráðgjafarfyrirtæki fá fyrir að aðstoða við svona stóra samninga. „Þetta er þannig geiri að samningarnir eru stórir og geta skilað miklum tekjum. En það getur líka verið langt á milli þeirra. Og góð ráð eru dýr. Okkar vinna snýst að hluta til um að brúa bilið á milli fjárfesta og meðalstórra fyrirtækja. Við erum stoltir af því að stór sjávarútvegsfyrirtæki við Norður-Atlantshafið hafa valið okkur til samstarfs við sína viðskiptaþróun.

Mörg sjávarútvegsfyrirtæki hafa ekki sérstakar einingar sem einbeita sér að viðskiptaþróun og ákvarðanataka er með öðrum hætti en til dæmis í fjármálageiranum sem er mjög drifinn áfram af tölulegum upplýsingum og mati á þýðingu þeirra. Við höfum talsverða reynslu af fjármálatengdri þjónustu við sjávarútveginn og höfum náð góðri yfirsýn og viðskiptasamböndum sem geta nýst vel fyrir þá sem eru að leita að hagræðingarmöguleikum í sínum rekstri."

Að sögn Kjartans eru mikil tækifæri í fyrirtækjaráðgjöf í sjávarútvegi á alþjóðavettvangi. „Við horfum á þrjá kjarna: Kanada, Noreg og Ísland. Það eru mikil tækifæri í Kanada og við munum áfram horfa þangað. Í Noregi eru 19 laxeldisfélög skráð í Kauphöllina í Ósló. Það eru mjög áhugaverð tækifæri í kringum þau vegna þess að það hafa orðið svo miklar breytingar á laxamarkaðinum.

Samkeppnin í Noregi er þó mjög mikil. Síðan horfum við á íslenskan sjávarútveg sem sofandi risa. Um leið og það skapast aukinn vinnufriður innan geirans verða fjölmörg tækifæri hér."

Þrátt fyrir að hlutverk Markó í stórum viðskiptasamningum erlendis hafi verið fyrirferðamikill hluti af starfsemi félagsins á árinu þá hefur það líka unnið töluvert innanlands. "Við höfum verið að vinna fyrir íslensku bankana og íslensk sjávarútvegsfyrirtæki. Ástæðan fyrir því að erlendu samningarnir eru sýnilegri er sú að nauðsynlegt hefur þótt að senda út fréttatilkynningar við gerð þeirra. Þar er enda um að ræða skráða aðila eða stóra fjárfestingasjóði með fjölda eigenda."

Nýtir sambönd

Kjartan er með meistarapróf í sjávarútvegsfræðum frá háskólanum í Tromsö. Fljótlega eftir útskrift árið 1999 hóf hann að vinna hjá hinum þá nýlega einkavædda Fjárfestingarbanka atvinnulífsins (FBA), sem síðar sameinaðist Íslandsbanka og varð Glitnir. Innan FBA voru sjóðir á borð við Fiskveiðisjóð og Iðnlánasjóð sem höfðu lánað töluvert innan sjávarútvegsins.

thordur@frettabladid.is