Flytja Emm­ess­ís í Grafar­vog

Í fréttatilkynningu þess efnis segir að skóflustungan hafi verið tekin þann 27. ágúst síðastliðinn af Hermanni Þór Jónssyni, sem hafi verið starfsmaður fyrirtækisins í 47 ár. Það hafi hann gert með sérsmíðari ísskeið. 

Húsnæðið verði reist af fasteignafélaginu Kaldalóni og áætlað sé að flutningar hefjist í lok árs 2026.

„Það er mikil tilhlökkun í loftinu kringum þetta spennandi verkefni. Nýju framleiðslutækin og frystibúnaðurinn verða bæði orkunýtnari og umhverfisvænni, auk þess sem framleiðslugeta okkar mun margfaldast. Í nýju höfuðstöðvunum ætlum við að skapa vistvænan vinnustað með frábæru vinnurými í fallegu umhverfi. Framtíðin er björt og við ætlum okkur að halda áfram að færa Íslendingum ís sem gleður allar kynslóðir!“ er haft eftir Kristjáni Geir Gunnarssyni, framkvæmdastjóra Emmessís.

Emmessís var stofnað árið 1960, en hefur verið í einkaeigu frá árinu 2007. Fyrirtækið er í dag í eigu 1912 ehf., sem er einnig móðurfélag Nathan & Olsen og Ekrunnar. Emmessís velti um 1,9 milljörðum króna árið 2024 og þar starfa tæplega 40 manns.