Binni hraunaði yfir fjölmiðla

Sigurgeir Brynjar Kristgeirsson, oftast nefndur Binni, framkvæmdastjóri Vinnslustöðvarinnar, fór hörðum orðum um fjölmiðla í erindi sem hann hélt á sjávarútvegsráðstefnu á Grand Hótel um miðjan þennan mánuð. Hann sagðist halda að það væri lítil sem engin gæðastjórnun á ritstjórnum, líkt og aðrar atvinnugreinar hefðu þróað með sér í gegnum tíðina.

Í erindinu, sem bar heitið Hvað er frétt?, gagnrýndi hann Morgunblaðið, einkum Agnesi Bragadóttur blaðamann, fyrir fréttir um útflutning á gámaþorski. „Mogganum hentaði þá að hnýta í útgerðarmenn," stóð á einni glæru sem Binni sýndi. Þessar fréttir ollu nokkru uppnámi er þær birtust, á sumarmánuðum árið 2007, en Styrmir Gunnarsson var þá ritstjóri Morgunblaðsins. Binni sagði í erindinu að fréttirnar hafi allar verið rangar og ekki byggðar á réttum upplýsingum. „Eitt mesta samsæri samtímans - ef satt hefði verið ... Ég fullyrði að „eigandinn" í Eyjum myndi fagna áframhaldandi úttekt," sagði m.a. í erindi Binna. Hann bætti síðan við enn stæði upp á Agnesi og Morgunblaðið að afhjúpa „svínarið".

Enn fremur gagnrýndi hann Stöð 2 og Ríkisútvarpið fyrir rangar fréttir, m.a. af málefnum lífeyrissjóða. Nefndi hann sem dæmi að Stöð 2 hefði greint frá því að Gildi lífeyrissjóður hefði verið rekinn með 60 milljarða halla, en engin tilraun hefði verið gerð til þess að skýra stöðuna í ljósi þess að í reynd hefði verið talað um tryggingarfræðilega stöðu. „Hvað eru þrír nýir landspítalar á milli vina," sagði Binni m.a. og vitnaði til umfjöllunar um skuldastöðu sjávarútvegsins sem hann sagði ranga í meginatriðum og byggða á misskilningi.

Þá gagnrýndi Binni Bergljótu Baldursdóttur, fréttamann RÚV, harkalega fyrir umfjöllun um sjávarútveg í Vestmannaeyjum. Hún hafi verið full af rangfærslum. Auk þess sagði Binni að hann hefði sagt Bergljótu frá því að tölurnar væru rangar áður en umfjöllunin birtist, en á hann hefði ekki verið hlustað.

Binni sagði síðan að „góðar fréttir" um sjávarútveginn í Vestmannaeyjum birtust nær aldrei, og vitnaði m.a. til gjafa sjávarútvegsfyrirtækja til samfélagsins. Tók hann dæmi af því þegar útgerðarmenn gáfu spítalanum í Eyjum 25 milljónir til tækjakaupa. Hvorki RÚV né Stöð 2 hefðu séð ástæðu til þess að segja frá því. „Það var önnur Ella þegar Jóhannes í Bónus tók upp veskið," sagði Binni.

Sagði hann enn fremur að fjölmiðlar hefðu ekki horft í eigin barm og skoðað vinnubrögð sín gagnrýnið eftir hrunið. Margt benti til þess að mikil þörf væri á því.

Glærur úr erindi Binna má sjá hér.