Vandræði Dexia hafa ekki áhrif á íslenska lántaka

Starfsemi fransk-belgíska bankans Dexia verður þjóðnýtt að hluta til, en ríkisstjórnir þriggja ríkja hafa samþykkt að veita bankanum afar umfangsmikla fjárhagsaðstoð. Fall bankans hefur ekki áhrif á íslenska lántaka bankans.

Í apríl 2008 lánaði Dexia Orkuveitu Reykjavíkur 100 milljónir evra á 48 punkta álagi á millibankavexti. Að sögn Eiríks Hjálmarssonar, upplýsingafulltrúa Orkuveitunnar, er ekkert í lánasamningnum sem gerir það að verkum að breyting á eignarhaldi bankans hafi áhrif á samninginn.

Lokað var fyrir viðskipti með hlutabréf bankans á fimmtudag eftir að verð bréfanna féll um meira en 17 prósent. Þá hafði ótti fjárfesta um að bankinn væri á leið í þrot magnast upp, en bankinn á mikið undir skuldabréfum ofurskuldsettra Evrópuríkja.

Vegna þessa hafði aðgangur bankans að lánsfé dregist mjög saman, en hann treysti á skammtímafjármögnun og því lék vafi á hvort bankinn gæti endurfjármagnað lán sín. Stjórnendur bankans hafa þannig reynt að leggja áherslu á að bankinn eigi í lausafjárvanda, en ekki eiginfjárvanda.

Í dag var svo tilkynnt um ríkisaðstoð til handa bankanum, en það verða ríkissjóðir Belgíu, Frakklands og Lúxemborgar sem bera hitann og þungann af henni. Þetta er í annað skiptið á þremur árum sem fé skattgreiðenda er veitt í bankann, en árið 2008 héldu sömu ríkisstjórnir Dexía á floti með innspýtingu upp á 6,4 milljarða evra, andvirði rúmlega þúsund milljarða króna.

Ríkisaðstoðin felur í sér að starfsemi Dexia í Belgíu verður þjóðnýtt, búist er við að alþjóðlegir fjárfestar komi til með að kaupa Lúxemborgararm bankans, og hluti starfseminnar í Frakklandi verði jafnframt á hendi ríkisins. Þá munu ríkissjóðir þessara ríkja ábyrgjast skuldir bankans upp að 90 milljörðum Evra á næstu tíu árum, andvirði um 14 þúsund milljarða króna, til að tryggja aðgang hans að lánsfé.

Þannig vilja ríkin tryggja að vandi bankans dreifi sér ekki um Evrópska fjármálamarkaði.