Tvær milljónir farþega árið 2012 - flogið til Denver

Icelandair hefur ákveðið að hefja áætlunarflug til Denver í Colorado frá og með 10. maí á næsta ári. Flogið verður fjórum sinnum í viku allt árið. Af því tilefni var haldinn blaðamannafundur á alþjóðaflugvellinum í Denver í morgun til að tilkynna um áætlunarflugið.

Í tilkynningu frá Icelandair segir að ákvörðun Icelandair um að hefja heilsársflug til borgarinnar á næsta ári vekji mikla athygli í Denver og í máli stjórnmálaleiðtoganna kom fram að þeir telja töluverð líkindi með Denver og Íslandi þegar kemur að flugsamgöngum. Denver sé tengimiðstöð fyrir innanlandsflug í Bandaríkjunum og Ísland sé tengistöð fyrir Bandaríkin og allra helst Evrópuborga. Mikil tækifæri skapist með beinu flug á mili borganna.

Borgarstjóri Denver sagði á blaðamannafundinum í morgun að koma Icelandair hefði mikil og jákvæð áhrif á efnahagslífið í Colorado. „Hann sagði þau áhrif nema um 28 milljónum dollara, eða 3,3 milljörðum króna. Um 300 störf yrðu til og þar af 33 bein ný störf. Flug Icelandair muni skapa sem nemur um einum milljarði króna í beinar launatekjur og um 2,2 milljarða króna í almennri neyslu ferðamanna í ríkinu," segir í tilkynningunni.

Flugáætlun Icelandair fyrir árið 2012 er sú stærsta í sögu félagsins og um 13 prósent umfangsmeiri en á þessu ári. Gert er ráð fyrir að farþegar félagsins verði um 2 milljónir á árinu 2012, en samkvæmt áætlunum verða þeir tæplega 1,8 milljónir á árinu 2011. Alls verða 15 Boeing 757 flugvélar nýttar á næsta ári, tveimur fleiri en á þessu ári. Þær munu taka á loftallt að 400 sinnum á viku yfir sumarið og þegar mest lætur verða um 10 þúsund farþegar á sólarhring.