Líkir gjaldeyrishöftunum við Íraksstríðið

Stjórnmálamenn, hagsmunasamtök og stjórnendur fyrirtækja eru á einu máli um að hægt sé að fara hraðar við afnám gjaldeyrishafta en nú er ráðgert. Einn kallar eftir nýrri áætlun um afnám haftanna, en annar líkir þeim við Íraksstríðið.

Á meðan þingmenn ræddu áfram um lögfestingu gjaldeyrishaftanna í þingsal í dag glímdu frummælendur á hádegisverðarfundi Félags viðskipta- og hagfræðinga við spurninguna um hvort hægt væri að fara hraðar við losun þeirra.

Allir sem tóku til máls voru þeirrar skoðunar að aðstæður væru vissulega fyrir hendi til að létta höftum fyrr en ráðgert er, eða að hægt hefði verið að hefjast handa fyrr en raunin var.

Bjarni Benediktsson, formaður Sjálfstæðisflokksins, gagnrýndi sérstaklega hversu höftin hafa dregist miðað við það sem stefnt var að þegar höftin voru sett á.

„Það var lagt upp með það að á gildistíma samstarfsáætlunarinnar við AGS yrðu höftin afnumin, þ.e.a.s. fyrir haustið 2010," segir Bjarni.

Páll Harðarson, forstjóri Kauphallarinnar, hefur einnig gagnrýnt seinagang við afnám haftanna, en hann vill að aðilar í viðskiptalífinu taki sig saman um að semja nýja áætlun um losun þeirra.

„Það hefur sýnt sig að sú grunnforsenda, sem sú áætlun sem nú liggur fyrir hvílir á, stenst ekki. Þegar svo er, þá er eiginlega ekkert annað að gera en að stokka spilin upp," segir Páll.

Bjarni tekur undir með Páli um að nýja og metnaðarfulla áætlun þurfi um afnám haftanna, en fyrst þurfi að setja fram trúverðuga efnahagsstefnu í landinu og móta peningastefnu til framtíðar.

Gísli Hauksson, framkvæmdastjóri GAMMA, tekur sömuleiðis undir þessar hugmyndir um nýja markvissari áætlun um losun hafta, en Orri Hauksson hjá Samtökum iðnaðarins líkti gjaldeyrishöftunum við Íraksstríðið á fundinum.

„Þetta var nú kannski ekki smekkleg líking, en líkindin eru þau að það vantar algjörlega útgönguáætlun. Það var auðvelt að komast inn, en um leið og þangað er komið vita menn ekkert hvernig þeir ætla að komast út. Það virðist líka hafa verið hugmyndafræðin á bak við höftin," segir Orri.