Segir Morgunblaðið draga rangar ályktanir af gögnum

Katrín Júlíusdóttir iðnaðarráðherra sagði ekkert standa uppi á stjórnvöld á kaupum Magma á HS Orku en þar svaraði hún fyrirspurn Ragnheiðar Elínar Árnadóttur, þingmanns Sjálfstæðisflokksins, í óundirbúnum fyrirspurnum á Alþingi í morgun.

Málið snýst um grein Morgunblaðsins þar sem því er haldið fram að Steingrímur J. Sigfússon fjármálaráðherra hafi beitt áhrifum sínum í ágúst 2009 til þess að ekkert yrði af byggingu álvers Norðuráls í Helguvík.

Ragnheiður Elín spurði iðnaðarráðherra hvort hún vissi af þessu meinta baktjaldamakki og hvort henni fyndist afskipti Steingríms eðlileg.

„Þarna var verið að vinna drög að samningum, þetta var ekkert baktjaldamakk," svaraði Katrín og benti á að gögnin vísuðu til þess þegar ríkið, ásamt sveitarfélögum og lífeyrissjóðum hugðist kaupa hlut í HS Orku. „Um það fjölluðu drögin. Það er ekkert óeðlilegt að menn setji saman framtíðarsýn hvað það varðar - og það þarf ekki að vera til höfuðs framtíðarinnar," sagði Katrín. Hún segir gögnin sem liggja fyrir í grein Morgunblaðsins, ágæta samantekt, en þar séu þó dregnar rangar ályktanir sem þurfi að skoða samhliða fjölmiðlaumfjöllun á sínum tíma.

„Ég lít svo á að í þessari ágætu samantekt séu dregnar rangar ályktanir sem enginn skammist sín fyrir að líti dagsins ljós," sagði Katrín meðal annars.

Óundirbúnar fyrirspurnir hófust á Alþingi klukkan hálf ellefu í morgun og var þingmönnum tíðrætt um fjarveru fjármálaráðherra sem var ekki í þingsal. Hann er staddur erlendis.

Bjarni Benediktsson formaður Sjálfstæðisflokksins hóf síðan fyrirspurnar tímann og spurði Svandísi Svavarsdóttur umhverfisráðherra út í frétt Morgunblaðsins frá því í dag er snýr að Steingrími J. Sigfússyni og kaupum Magma á HS Orku.

Sagði hann ljóst að samkvæmt því sem þar kæmi fram hefði Steingrímur lagt blessun sína um að Magma fengi að kaupa helmingshlut í HS Orku á fyrstu stigum málsins. Síðan hefðu hver nefndin á fætur annarri verið sett á laggirnar. Í því Írafári hefði Umhverfisráðherra komið inn í umræðuna og sagt að pólitískur vilji ríkisstjórnarinnar væri alveg skýr.

Svandís sagðist ekki hafa lesið greinina og Bjarna væri í raun vorkunn að byggja fyrirspurnina á þeim forsendum. Hún sagði það sinn vilja að vinda ofan af einkavæðingu HS Orku.

Þingmenn hafa óskað eftir þeim gögnum sem Morgunblaðið greinir frá í dag.