Innanstokksmunir Hótel D´Angleterre á uppboð

Ef gjaldeyrishöftin væru ekki til staðar ættu Íslendingar þess kost að eignast húsgögn úr hinu sögufræga Hótel D´Angleterre.

Þetta lúxushótel sem stofnað var árið 1755 hefur sett innanstokksmuni sína á uppboð í Kaupmannahöfn. Ástæðan er að verið er að  endurnýja á hótelið frá grunni og er það því lokað fram á næsta ár.

Í frétt um málið í Jyllands Posten segir að munirnir sem seldir verða á uppboðinu séu að mestu borð, stólar, lampar og speglar sem voru á herbergjum og göngum hótelsins.

En það má einnig finna ýmsa aðra athylgisverða muni á þessu uppboði. Má þar m.a. nefna mínibari úr mahóní, safari-fléttustólinn úr Karen Blixen svítunni og gamlar myndir af háðfuglinum  og tónlistarmanninum Victor Borge.

Það er uppboðshúsið Hörsholm sem sér um uppboðið og þar á bæ reikna menn með að um þrjár milljónir danskra kr. eða um 66 milljónir króna fáist fyrir innanstokksmunina.