Óvíst hvort Yao Ming sé hættur

Umboðsmaður NBA-leikmannsins Yao Ming, John Huizinga, vildi ekki staðfesta við fjölmiðla ytra að leikmaðurinn væri búinn að leggja skónna á hilluna.

Ming hefur boðað til blaðamannafundar 20. júlí í Shanghai þar sem hann mun greina frá áætlunum sínum um framtíðina. 

„Ég er ekki í aðstöðu til að tjá mig um málið,“ sagði John Huizinga, umboðsmaður Yao Ming.

„Hann mun halda blaðamannafund 20. júlí næstkomandi og ég mun ekki tjá mig um þetta mál fyrir en hann hefur gefið út yfirlýsingu“.

Yahoo! Sports greindu fyrst frá því að leikmaðurinn væri búinn að leggja skónna á hilluna en hvorki Houston Rockets né NBA-deildin hefur staðfest það.

Yao Ming hefur verið meiddur meira og minna allan sinn feril og misst af 250 deildarleikjum með Houston Rockets undanfarin 6 tímabil og verið mikið frá, en hann lék aðeins fimm leiki á nýafstöðnu tímabili.