S&P setur Landsvirkjun á athugunarlista, horfur neikvæðar

Standard & Poor´s (S&P) sendi nú rétt fyrir hádegi frá sér tilkynningu um að það hefði sett lánshæfismat Landsvirkjunar á athugunarlista með neikvæðum horfum. S&P segir matið háð því hvernig þróunin verður á lánshæfi ríkissjóðs.

Þetta kemur fram í Morgunkorni greiningar Íslandsbanka. Þar segir að sem kunnugt er hangir fjármögnun Búðarhálsvirkjunar nokkuð á þessari þróun þar sem í lánasamningnum sem Landsvirkjun gerði við Evrópska fjárfestingarbankann í marsmánuði er ákvæði um lágmarks lánshæfiseinkunn.

Þó hefur þróunin ekki áhrif á næstu skref í byggingu virkjunarinnar þar sem fyrirtækið tilkynnti í gær um lánasamning við Landsbankann sem nemur 100 milljónum dollara, jafnvirði ríflega 11,3 milljörðum kr.

Ljóst er að matsfyrirtækin þrjú, S&P, Moody´s og Fitch Ratings,  eru öll á sama máli um að lausn á Icesave-málinu sé mikilvægur þáttur í því að lánshæfismat ríkissjóðs batni. Þegar er ríkissjóður kominn með eina einkunn í spákaupmennskuflokki frá matsfyrirtækinu Fitch, og miðað við framvindu mála undanfarið er ekki hægt að útiloka að annað hinna matsfyrirtækjanna tveggja komi til með að lækka lánshæfiseinkunn ríkissjóðs niður í spákaupmennskuflokk. Er það alvarlegra mál ef raunin verður svo heldur en þegar Fitch lækkaði sína einkunn, enda leggja bæði Moody´s og S&P mat á lánshæfi Landsvirkjunar.

Hvort S&P muni lækka lánshæfieinkunn ríkissjóð kemur væntanlega í ljós á næstu vikum. Sögulega séð er þó líklegra en ekki að fyrirtækið muni ráðast í lækkun og má hér benda á að undanfarin 20 ár hefur raunin orðið svo í 70% tilvika hjá fyrirtækinu þegar það hefur sett lánshæfiseinkunnir ríkja á athugunarlista með neikvæðum vísbendingum. Þetta hefur yfirleitt gerst innan 6 vikna hjá fyrirtækinu.

Ef litið er á þessa þróun hvað Ísland varðar þá hefur S&P sett ríkissjóð þrisvar sinnum áður á þennan athugunarlista og í öllum tilvikum hefur lækkun átt sér stað. Fyrst setti fyrirtækið ríkissjóð á athugunarlista þann 1. apríl árið 2008 og var þá einkunn ríkissjóðs fyrir erlendar langtímaskuldbindingar hjá fyrirtækinu A+. Rétt rúmum tveimur vikum síðar lækkaði það einkunnir ríkissjóðs um eitt þrep.

Þann 29. september sama ár setti það lánshæfiseinkunnir ríkissjóðs aftur á athugunarlista sem var jafnframt sama dag og það lækkaði einkunnir ríkissjóðs um eitt þrep. Nokkrum dögum síðar lækkaði það einkunnir ríkissjóðs um tvö þrep.

Þriðja skiptið sem það setti lánshæfiseinkunnir ríkissjóðs á athugunarlista var þann 5. janúar í fyrra í kjölfar ákvörðunar forseta Íslands að senda Icesave í þjóðaratkvæðagreiðslu. Að þessu sinni stöldruðu einkunnirnar lengur við á athugunarlista en áður. Niðurstaðan var svo sú að einkunnin fyrir erlendar skuldbindingar var ekki lækkuð að sinni, heldur lækkaði fyrirtækið lánshæfiseinkunnir fyrir innlendar skuldbindingar.