Jóhanna: Vissulega vonbrigði

„Mér finnst margt benda til þess að Nei-ið verði ofan á í þessari þjóðaratkvæðagreiðslu, það veldur vissulega vonbrigðum," segir Jóhanna Sigurðardóttir, forsætisráðherra, aðspurð um fyrstu viðbrögð við fyrstu tölum úr þjóðaratkvæðagreiðslunni.

Jóhanna er gestur í Kosningasjónvarpi RÚV ásamt leiðtogum hinna stjórnmálaflokkanna. Samkvæmt fyrstu tölum segja 62,8 % Nei á meðan 37,2% segja já. Búið er að telja um 18 þúsund atkvæði. Taka verður fram að ekki er búið að telja atkvæði í stóru kjördæmunum, Reykjavík Norður og Suður.

„Það virðist vera nú vera svo að þetta eru afgerandi tölur, en fyrstu tölur gefa oft vísbendingu um hvað koma skal," segir Jóhanna.