FME gagnrýnir Sameinaða lífeyrissjóðinn, krefst úrbóta

Fjármálaeftirlitið (FME) gagnrýnir rekstur Sameinaða lífeyrissjóðsins og gerir fjölmargar athugasemdir við það hvernig málum er háttað hjá sjóðnum þar á meðal fjárfestingar hans. Forráðamenn Sameinaða lífeyrissjóðsins hafa frest fram til aprílloka að koma lagi á hlutina hjá sér.

Fjallað er um málið á vefsíðu FME. Þar segir að framkvæmd var athugun á fjárfestingum Sameinaða lífeyrissjóðsins með heimsókn og gagnaöflun dagana 10.-12. nóvember 2010 með vísan til laga um skyldutryggingu lífeyrisréttinda og starfsemi lífeyrissjóða og laga um opinbert eftirlit með fjármálastarfsemi.

Fjármálaeftirlitið óskar eftir því við stjórn lífeyrissjóðsins að hún feli innri eftirlitsaðila að gera sérstaka grein fyrir því hvort gripið hafi verið til viðeigandi ráðstafana vegna ábendinga og athugasemda sem fram koma hjá FME. Greinagerð innra eftirlits skal send Fjármálaeftirlitinu eigi síðar en 30. apríl 2011.

Fjármálaeftirlitið átti gott samstarf við forsvarsmenn sjóðsins meðan á vettvangsathuguninni stóð og hefur nú þegar verið brugðist við flestum athugasemdum og ábendingum Fjármálaeftirlitsins.

Helstu athugasemdir sem Fjármálaeftirlitið gerði við starfsemi sjóðsins voru m.a.:

Gerðar voru athugasemdir við fjárfestingarstefnu sjóðsins fyrir árið 2010 þar sem hún uppfyllti ekki þær kröfur sem gerðar eru í reglugerð um fjárfestingarstefnu og úttekt á ávöxtun lífeyrissjóða og vörsluaðila séreignasparnaðar.

Fjármálaeftirlitið taldi að hvorki væru til staðar fullnægjandi reglur og verkferlar um fjárfestingar sjóðsins né fullnægjandi reglur er lytu að fjárfestingaákvörðunum. Einnig kom fram við athugun eftirlitsins að ekki væru til skýrar reglur um upplýsingagjöf til stjórnar.

Ekki hefur farið fram skráning á viðskiptum starfsmanna og stjórnarmanna með fjármálagerninga.

Framkvæmdastjóri og formaður stjórnar hafa því ekki fylgst reglulega með upplýsingum um verðbréfaviðskipti starfsmanna.

Ekki voru til skýrar verklagsreglur fyrir framkvæmdastjórn sjóðsins að vinna eftir né reglur fyrir forstöðumann eignastýringar.

Gerð var athugasemd við að Sameinaði lífeyrissjóðurinn hefði fjárfest í óskráðum íslenskum félögum með forkaupsrétti sem er óheimilt samkvæmt lögum og framtaksfjárfestingum. Gerð var krafa um að sjóðurinn stöðvaði þegar í stað allar frekari fjárfestingar í slíkum félögum og sjóðum sem uppfylla ekki fyrrgreind lagaskilyrði.

Fjárfestingar í tveimur framtakssjóðum voru ranglega flokkaðar sem skráðir fjármálagerningar.

Fjármálaeftirlitið taldi að fjárfesting í Eignarhaldsfélagi Sameinaða lífeyrissjóðsins fullnægði ekki að öllu leyti skilyrðum fyrir fjárfestingu í félagi sem eingöngu sinnir þjónustuverkefnum fyrir sjóðinn.

Ekki hefur farið fram endurmat á verðmæti eigna sjóðsins í tveimur fagfjárfestasjóðum.

Samningar sjóðsins um viðbótarlífeyrissparnað hafa ekki verið uppfærðir til samræmis við breytingar á lögum um lífeyrissparnað.

Samningar, og reglur um viðbótarlífeyrissparnað hafa ekki verið sendir til samþykktar til fjármálaráðuneytisins samkvæmt lögum.

Fjármálaeftirlitið mun birta gagnsæistilkynningu á heimasíðu sinni eftir að innri endurskoðandi sjóðsins hefur sent skýrslu yfir þær úrbætur sem sjóðurinn hefur framkvæmt.