Risagjalddagi framundan, hvert fara erlendar krónueignir?

Eins og víða hefur komið fram fellur ríkisbréfaflokkurinn RB 10 1012 á gjalddaga 10. desember næstkomandi. Flokkurinn hefur þá sérstöðu að eignarhald hans er nær eingöngu í höndum erlendra aðila, 93% í lok september, en markaðsvirðið er í dag um 53 milljarðar króna . Stærsta spurningin er nú hvert mun þetta fjármagn leita?

Þetta segir í Markaðspunktum greiningar Arion banka þar sem leitað er svara við spurningunni. Munu erlendir aðilar færa sig í aðra styttri ríkisbréfaflokka, eða e.t.v. innlán og/eða munu þeir skipta stórum hluta af vaxtagreiðslunum í erlendan gjaldeyri?

Í Markaðspunktunum segir að það sem aðgreinir RB 10 frá öðrum ríkisbréfaflokkum er augljóslega að styttra er í gjalddaga og að vaxtagreiðslur eru mun hærri en á öðrum ríkisbréfaflokkum. T.a.m. eru vaxtagreiðslur lengri flokka ríkisbréfa á bilinu 6-8,75% en vaxtagreiðsla RB 10 nemur 13,75%.

„Því mætti e.t.v. ætla við fyrstu sýn að erlendir aðilar kjósi að kaupa RB 10 svo að þeim sé kleift að skipta vaxtagreiðslum yfir í erlendan gjaldeyri. Raunin hefur reyndar ekki verið sú á undangengnum misserum, þ.e. það er lítil fylgni milli vaxtagreiðslna af ríkisbréfaflokkum til erlendra aðila og veikingar krónunnar. Þó er ekki með öllu hægt að útiloka að raunin verði sú nú þegar flokkurinn lendir á gjalddaga," segir í Markaðspunktunum.

„Hér má einnig benda á að erlendum aðilum er heimilt að skipta afborgunum og vöxtum af íbúðarbréfum (HFF 14) í erlendan gjaldeyri. Því gætu þeir komið fjármunum sínum úr landi með mun fljótari hætti með kaupum á íbúðarbréfum en með kaupum á ríkisbréfum, en hingað til hafa þeir haft lítinn áhuga á verðtryggðum bréfum eins og staða þeirra gefur til kynna."

Í mars 2010 féll á gjalddaga stórt skuldabréf, RIKB 10 0317, en erlendir aðilar áttu ríflega 85% af þeim flokki sem svarar til 50 milljarða króna að markaðsvirði. Sama mánuð og flokkurinn féll á gjalddaga juku erlendir aðilar við sig í stystu flokkunum en þó ekki nóg til að vega upp á móti því sem féll á gjalddaga. Hefur því heildareign erlendra aðila í óverðtryggðum ríkisskuldabréfum lækkað töluvert frá byrjun árs.

Svo virðist sem að það lausafé sem varð til hjá erlendum aðilum í mars 2010 hafi aldrei skilað sér að fullu aftur inn á skuldabréfamarkaðinn. Því er nærtækast að spyrja hvert peningurinn hefur farið.

Nokkrir möguleikar eru til staðar:

Vaxtagreiðslur hafi farið úr landi. Ekki er hægt að útiloka að eitthvað flæði hafi verið úr krónunni í formi vaxtagreiðslna af ríkisbréfum. Gengi krónunnar hefur ekki veikst í kringum stóra gjalddagi sem gefur vísbendingu um að öll vaxtagreiðslan hafi ekki farið samstundis úr landi.

Erlendir aðilar hafi fjárfest í innlánum. Samkvæmt riti um Fjármálastöðugleika hafa innlán erlendra aðila í krónum aukist um 39 milljarða kr. á fyrstu 6 mánuðum árisins. Þetta virðist því skýra einhvern hluta af flæði erlendra aðila úr ríkisbréfaflokkunum.

Svo má að lokum velta því fyrir sér hvort erlendir aðilar hafi fjárfest í öðrum verðbréfum t.d. verðtryggðum eða óskráðum skuldabréfum.