Sigurður Bjarnason: Við fórum bara á taugum

Sigurður Bjarnason, EM-sérfræðingur Vísis, átti varla orð eftir jafnteflisleik Íslands og Austurríkis í dag enda klúðraði íslenska liðið enn á ný unnum leik. Sigurður vill sjá Guðmund landsliðsþjálfara nota liðið betur og halda trúnni á 6:0 vörnina.

„Þetta er "algjört flashback" frá því í leiknum á móti Serbíu og maður skilur ekki í því af hverju strákarnir hafa ekki taugar í síðustu tvær mínturnar.

Burt séð frá því sem er búið að gerast allan leikinn, hvort sem einhver klikkaði á skoti eða vörnin var ekki nógu góð, þá erum við með unninn leik í höndunum í bæði skiptin og þá sérstaklega í kvöld.

Ef Gaui hefði skorað þá hefðum við verið þremur mörkum yfir og leikurinn búinn. Í staðinn förum við í vörnina og þeir skora strax. Við förum bara á taugum þessar 20 sekúndur sem voru eftir.

Ég held að menn eigi að valda þessu og ég held að þessar síðustu 30 sekúndur verði að skrifast á liðið sem heild. Menn eiga að halda þetta út. Ég treysti strákunum alveg til þess að koma til baka enda eru þeir ekki fæddir í gær.

Þetta er stig en aftur tapað stig. Við erum ennþá í hlutverki þess að vera betri aðilinn í leiknum og með yfirhöndina. Þetta var ekki eins og við værum að skíta í brækurnar og að við værum heppnir með að ná jafnteflinu. Það má ekki fara að snúa þessu þannig við að við höfum verið lakari aðilinn.

Við erum klárlega betri aðilinn í báðum þessum leikjum og við erum komnir með tvö stig. Ef við vinnum Danina þá erum við með þrjú stig í milliriðli og þá er heimurinn orðinn flottur á ný.

Það er engin ástæða til þess að örvænta en ég hef áhyggjur af stöðum í framtíðinni. Ef þessi sama staða kemur upp á móti Dönum þá er ég ekkert að treysta þeim í það að klára þetta.

Mér fannst Gummi ekki vera að gera góða hluti í þessum leik. Hann er búin að eyðileggja tvo leikmenn, Loga og Aron. Hann notar Ásgeir Örn heldur ekki neitt nema ef við eru manni færri og það er ekki gott upp á framhaldið.

Við þurfum virkilega á þessum leikmönnum að halda núna og ég er hræddur um að þeir séu búnir í keppninni hvað sálfræðihliðina varðar. Hann er ekki búinn að gefa þeim neitt einasta sjálfstraust og það er hlutverk þjálfarans að gera það.

Ég vil sjá okkar leikmenn skiptast á og það er hollt að koma útaf þó að það sé bara í fimm mínútur. Eins og fyrir Óla þá er gott að að koma útaf og sjá leikinn aðeins utan frá en koma síðan ferskur inn í leikinn með nýjar hugmyndir.

Ég vil líka að við spilum þessa 6:0 vörn út í gegn og höfum trú á henni. Gummi er að fara út í allskonar pælingar eins og með 3:2:1 vörnina. Hann á bara að laga það sem er að í 6:0 vörninni og halda áfram að spila hana. Þannig náðum við silfrinu í Peking.

Arnór Atlason er að standa sig rosalega vel og það má ekki gleyma því að strákurinn er að standa sig rosalega vel í vörninni líka. Hann er hundrað prósent í öllu sem hann er að gera. Menn horfa núna á sóknina hjá honum af því að hann er að skora en hann er að standa sig alveg jafnvel í vörninni. Ég vil ekki að það gleymist.

Það er skemmtilegasti leikurinn eftir. Nú erum við búnir með þessi slakari lið eins og Austurríki og Serbíu og getum hætt að vanmeta og farið að spila okkar leik.