Geir segir ákæruna jaðra við pólitískar ofsóknir

Ákæran sem Alþingi samþykkti í dag er pólitískt upphlaup og jaðrar við það að vera pólitískar ofsóknir, sagði Geir H. Haarde, fyrrverandi forsætisráðherra, í samtali við RÚV um ákærurnar gegn sér.

Geir sagði að niðurstaðan væri þungbær og erfið. Hann gæti ekki leynt því. Hann hafi vonast til að Alþingi hefði ákveðið að taka ákæruvald sitt alvarlega en svo virtist sem pólitík hefði hlaupið í málið. Sérstaklega hjá Samfylkingunni þar sem nokkrir þingmenn Samfylkingarinnar hefðu ákveðið að hlaupa milli ráðherra og ákveðið að finna ráðherra til að ákæra

Geir sagðist vera feginn því að hinir ráðherrarnir hafi ekki verið ákærðir. Hann vildi miklu frekar mæta einn fyrir dóminn en að þau væru ákærð líka.

Hann sagði að það hefði verið óþægilegt að sitja fyrir framan sjónvarpið og sjá menn eins og Atla Gíslason fara með staðlausa stafi án þess að geta svarað fyrir sig.