Hjálmar Hjálmarsson: Júróvisjón lýðræði

Nú er ljóst að þjóðin gengur til tvennra kosninga n.k. laugardag. Í öðrum þeirra og þeim mikilvægari sýnist mér, gefst okkur tækifæri til að velja besta sönglag Evrópu þetta árið í Evróvisíón og í hinum fáum við tækifæri til að velja okkur fulltrúa í stjórn bæjarins okkar.

Það er gaman að bera saman umfjöllun RÚV um þessar tvennar kosningar. Hollenska lagið Shalala fær u.þ.b. 10 sinnum lengri tíma til að kynna framlag sitt, en X-listinn í Kópavogi. NæstBestiFlokkurinn, sem er nýtt framboð, fékk samtals 30 sekúndur í sjónvarpi allra landsmanna í stuttu Kastljós-innslagi 10 dögum fyrir kosningar. Þá er í fréttum RÚV í þessari viku vitnað í 6 vikna gamla skoðanakönnun um fylgi flokkanna í Kópavogi sem var gerð löngu áður en framboðsfrestur rann út og þrír af sjö framboðslistum voru þá ekki komnir fram. Hins vegar var fjallað um Evróvisíón sönglagakosningarnar í fimm 50 mín. sérlöguðum sjónvarpsþáttum með einum þekktasta og best klædda skemmtikrafti landsins sem leitaði álits annálaðra og prúðbúinna sérfræðinga á sviði Evró-sönglaga, sem fjölluðu á ítarlegan hátt um útlit, framkomu og flutning allra frambjóðenda til Evróvisíón-kosninganna, í skemmtilegu og litríku umhverfi í sjónvarpssal allra landsmanna. Auk þess bar fyrir augu samevrópskan þátt um þetta efni sem tók um klst. í flutningi. Þess utan fáum við í kosningavikunni 7 klst. útsendingu frá Júró-kosningunum sjálfum sem enda vonandi vel á laugardaginn þegar ritstjóri Kastljóssins kynnir kosningaúrslitin í beinni frá Osló.

Auðvitað geta menn rifist fram og til baka um það hvort framlag X listans NæstBestaFlokksins, til kosninganna í Kópavogi sé eins skemmtilegt eða merkilegt eða hversu áhugavert sjónvarpsefni það er í samanburði við framlag Hollands, Shalala, til Evróvisíón kosninganna en maður veltir því óneitanlega fyrir sér hvernig stjórn RÚV skynjar hlutverk sitt þegar kemur að lýðræðisumræðu og upplýsingu til almennings um grundvallar réttindi fólks. Sannarlega erum við langflest búinn að fá hundleið á hinu flokkspólitíska argaþrasi en Íslendingar eru ekki leiðir á stjórnmálum. Þeir vilja einmitt hafa meira um hlutina að segja. Við erum hins vegar komin með upp í kok af gömlu, ónýtu og spilltu flokkunum og það lýsir sér vel í góðu gengi Bestaflokksins í Reykjavík. Því miður höfum við ekki tækifæri til að velja besta lagið í Evróvisíón kosningunum á laugardaginn. Við verðum því að treysta evrópskum kjósendum til þess að velja Heru og Örlyg Smára en neyðumst sjálf til að kjósa það næstbesta. Ég sting upp á að kjósendur í Kópavogi geri það einnig á laugardaginn, setji x við X og velji NæstBestaFlokkinn.

P.S. Hefðu ekki sparast einhverjar krónur við það að láta Þóru Tómasdóttur fyrrverandi Kastljósdrottningu lýsa Evróvisíón kosningunum? Hún býr jú í Osló, talar þessa fínu norsku líka og hefði farið létt með þetta.

Höfundur er oddviti NæstBestaflokksins í Kópavogi.