Íslensku þekkingarverðlaunin 2010: Fjögur fyrirtæki tilnefnd

Fyrirtækin CCP, Fjarðarkaup, Icelandair Group og Össur eru tilnefnd til þekkingarverðlauna FVH en Félag viðskiptafræðinga og hagfræðinga afhendir verðlaunin í tíunda sinn 11. febrúar nk. á Hilton Reykjavík Nordica.

Auk Þekkingarverðlaunanna verður kynnt val félagsins á viðskipta- eða hagfræðingi ársins, sem fellur í skaut aðila sem þykir hafa náð framúrskarandi árangri í starfi á liðnu ári. Forseti Íslands, herra Ólafur Ragnar Grímsson, mun afhenda verðlaunin en hann er verndari þekkingardagsins.

Vilhjálmur Þorsteinsson, stjórnarformaður CCP, mun flytja erindi við athöfnina en CCP hlaut þekkingarverðlaunin á síðasta ári og er því tilnefnt í annað sinn í röð.