Metásókn í leigu íbúðarhúsnæðis í ágúst

Í ágúst síðastliðnum var samtals 1.245 leigusamningum um íbúðarhúsnæði þinglýst á landinu. Þetta er mesti fjöldi leigusamninga sem þinglýst hefur verið innan eins mánaðar það sem af er þessu ári, og reyndar mesti fjöldi sem sést hefur í einum mánuði síðan síðastliðið haust.

Greining Íslandsbanka fjallar um málið í Morgunkorni sínu. Þar segir að hér sé að verki árstíðarsveifla, en fjöldi þinglýstra leigusamninga rýkur að jafnaði upp á haustin þegar skólarnir hefjast að nýju og mikil hreyfing er á leigumarkaði.

Reyndar hefur þróunin síðustu mánuði verið sú að sókn í leiguhúsnæði hefur frekar verið að dragast saman eftir að hafa verið í stórfelldri sókn allt frá bankahruni. Líklega mun sú þróun halda áfram eftir að þessi haustsveifla líður hjá.

Fyrstu sjö mánuði þessa árs hefur 6.681 leigusamningum um íbúðarhúsnæði verið þinglýst, sem er fækkun um 2% frá sama tímabili fyrir ári síðan. Engu að síður er enn um gríðarlega mikla sókn í leiguhúsnæði að ræða miðað við það sem áður var. Þannig var t.d. aðeins 5.000 leigusamningum um íbúðarhúsnæði þinglýst á ári að meðaltali frá árinu 2005 og til og með árinu 2007.

Engan þarf að undra að sókn í leiguhúsnæði hafi verið jafn mikil og raun ber vitni undanfarin misseri. Mikil óvissa ríkir á íbúðamarkaði um hvernig framboð og eftirspurn muni þróast þar sem endurskipulagning á skuldum heimilanna er enn í vinnslu.

Þessi óvissa sem hefur skapast um hvaða úrræði séu í boði og hvort meira sé í vændum hefur gert það að verkum að margir halda að sér höndum og bíða. Nú hefur óvissa um lögmæti gengistryggðra húsnæðislána bæst við og aukið enn á óvissuna. Í árferði sem þessu er því eðlilegt að margir sem áður hefðu íhugað íbúðakaup leiti á leigumarkaðinn.