Ragga Gísla og Bó starfa saman eftir þrjátíu ára hlé

„Ég ætla aðeins að tékka á Bó,“ segir Ragnhildur Gísladóttir, sem verður einn af gestum Björgvins Halldórssonar á jólatónleikum hans í desember.

Heil þrjátíu ár eru liðin síðan leiðir þeirra lágu síðast saman í hinum smáa íslenska tónlistarbransa, við plötuna Dagar og nætur. Ragnhildur fór ekki fögrum orðum um samstarfið við Björgvin í Poppbókinni eftir Jens Guð sem kom út 1983 og hefur því mörgum komið á óvart að sjá þau saman á auglýsingaplakötum fyrir jólatónleikana. Í bókinni er þetta haft eftir Ragnhildi: „Þetta átti að verða voða vinsælt pródúkt. Músíkin var leiðinleg og fílingurinn milli okkar Bjögga var upp og niður. Við höfum svo ólíkan músík­smekk.“ Minnst var á ummæli Ragnhildar í ævisögu Björgvins sem kom út fyrir nokkrum árum.

Ragnhildur viðurkennir að þau Björgvin hafi ekki alltaf verið sammála á þessum tíma en þau hafi þó langt í frá verið einhverjir erkifjendur síðustu þrjátíu árin. Hún segir það engu að síður hafa komið sér dálítið á óvart þegar Björgvin hafði samband við hana vegna jólatónleikanna. „Við höfum ekkert verið að vinna neitt saman eða verið í neinum samskiptum fyrr en núna. En það er ekki búinn að vera neitt vondur fílíngur eða neitt. Það hefur bara ekki verið neitt samband og allt í góðu með það. En við getum bæði verið svolítið stríðin. Það getur verið að það sé eitthvað sem fólk er að tala um,“ segir hún.

Björgvin er ánægður með að Ragnhildur sé komin í lið með sér eftir öll þessi ár. „Hún var í Brimkló um tíma og í framhaldi af því gerðum við plötuna Dagar og nætur, sem ég myndi segja að sé orðin hálfgerð klassík,“ segir hann en á henni eru slagararnir Ég gef þér allt mitt líf, titillagið Dagar og nætur og Fyrsta ástin. „Við gerðum þessa plötu og svo fór hún í Grýlurnar og svo í Stuðmenn. Það er sérstaklega gaman að fá hana til liðs við okkur. Við hlökkum mikið til að sjá hana því hún er ein af okkar bestu,“ fullyrðir hann.

Spurður hvort samskipti þeirra hafi verið stirð í gegnum árin segir Björgin: „Nei, það hefur aldrei verið. Ekki af minni hálfu og ekki frá henni, held ég. Ég bara fór í eina átt og hún fór í aðra. Hún hefur ákveðið að mennta sig í tónsmíðum og það er bara æðislegt. Þessu samstarfi lauk bara og það er frábært að fá hana í lið með okkur á þessum tónleikum. Hún bætir svo sannarlega hópinn.“

freyr@frettabladid.is