Tekjur ríkissjóðs drógust saman um 12 milljarða

Tekjur ríkissjóðs drógust saman um rúma 12 milljarða króna á fyrstu þremur mánuðum þessa árs miðað við sama tímabil í fyrra. Þetta kemur fram í yfirliti fjármálaráðuneytisins um greiðsluafkomu ríkissjóðs. Tekjur ríkissjóðs vegna fjármagnstekjuskatts drógust saman um nærri helming.

Tekjur ríkissjóðs á fyrsta ársfjórðungi námu tæpum 111 milljörðum króna en á sama tímabili í fyrra námu þær rúmum 123 milljörðum.

Verulega dregur úr tekjum ríkissjóðs vegna fjármagnstekjuskatts - sem fer úr 28 milljörðum í sextán milljarða milli ára. Innheimta skatta á fyrirtæki minnkar um þriðjung en tekjuskattur einstaklingar hækkar hins vegar lítillega.

Fram kemur í yfirliti fjármálaráðuneytisins að tekjuþróunin sé lakari heldur áætlanir gerðu ráð fyrir.

Steingrímur J. Sigfússon, fjármálaráðherra, vill þó ekki skella skuldinni á skattahækkanir ríkisstjórnarinnar og segir þvert á móti að tekjur ríkissjóðs hefðu verið mun minni ef ekki hefði komið til þeirra.

„Þær eru talsvert meiri en þær væru ella vegna þess að það var farið í skattkerfisbreytingar og hækkaðir ýmsir skattar, en tekjurnar eru mjög tengdar veltu og umsvifum í þjóðfélaginu. Það var slaki aðeins á fyrstu mánuðinum sem við höfðum auðvitað áhyggjur af en það hefur heldur rétt af aftur þegar fjórir mánuðir eru skoðaðir. Þannig að í öllum aðalatriðum erum við á áætlun," segir Steingrímur.

En hefur þetta áhrif á niðurskurðaráform ríkisstjórnarinnar? „Nei en þetta hefur áhrif á það hvernig við stillum af endurskoðun efnahagsáætlunarinnar til næstu ára. Því við getum ekki bara leyft okkur að horfa á árið í ár. Við verðum líka að horfa til áranna 2013, 2014 og það hvernig við náum að lokum jöfnuði í ríkisrekstrinum. Við verðum að vinna þennan halla sem stefnir í að verða 90 til 100 milljarðar í ár niður í núll á ekki of mörgum árum," segir Steingrímur.