Aftur boðað til mótmæla fyrir framan heimili Þorgerðar

Aftur hefur verið boðað til mótmæla fyrir framan heimili Þorgerðar Katrínar Gunnarsdóttur, varaformanns Sjálfstæðisflokksins, í kvöld. Nokkrir mótmæltu fyrir framan heimili hennar í gær. Benedikt Guðmundsson, sölustjóri hjá Steypustöðinni, fékk boð um að mæta á mótmælin með SMS-skilaboðum og hvattur til að áframsenda þau. Hann gagnrýnir þessa aðferðarfræði harðlega.

„Ég ætla ekkert að draga úr ábyrgð Þorgerðrar Katrínar í hruninu og því sem Þorgerður Katrín og eiginmaður hennar hafa fengið frá bankanum. Ég vil að hún segi af sér helst í dag," segir Benedikt. „En sú aðferðarfræði sem menn eru að nota er ekki mannsæmandi. Að ráðast á heimili manna þar sem búa lítil börn," segir Benedikt. Benedikt segist eiga börn sjálfur. Hann viti að að svona árás á heimili fólks þar sem vinir og krakkar búi í götunni geti verið mjög óþægileg. „Börnin fara síðan í skólann daginn eftir og hvað er þá sagt," segir Benedikt.

Benedikt segir að það hljóti að vera hægt að nálgast Þorgerði Katrínu einhversstaðar annarsstaðar. „Ég skal fara með þeim fyrir framan Alþingi og mótmæla en þetta gengur ekki," segir Benedikt.